قازاقستان پرەزيدەنتى قاسىم-جومارت توقاەۆ شىمكەنت قالاسىنا ساپارى بارىسىندا قولعا الىنىپ جاتقان سالىق رەفورماسى جايىندا پىكىر ءبىلدىردى. بۇل تۋرالى اقوردا جازدى، دەپ حابارلايدى “ادىرنا” ۇلتتىق پورتالى.
پرەزيدەنتتىڭ ايتۋىنشا، ۇكىمەت سالىق ساياساتىن قاتاڭداتپاي، كەرىسىنشە رەتكە كەلتىرمەك.
«قازىرگى كودەكس كوپ وزگەرىسكە ۇشىراعان. زاڭعا تاۋەلدى اكتىلەرگە جانە جەكەلەگەن جاعدايلاردا باسقاشا ەرەجە قولداناتىن ەرەكشەلىكتەرگە تولى. كودەكس وقىپ، تۇسىنۋگە قيىن قۇجاتقا اينالعان. سونىڭ سالدارىنان كاسىپكەرلەر مەن مەملەكەتتىك قىزمەتكەرلەر ونى ارقالاي قابىلداپ، ءوز ۋاجدەرىن العا تارتادى. قاپتاعان جەڭىلدىكتەر مەن سالىق رەجيمدەرى كاسىپكەرلەردىڭ ءبىر بولىگىنە ارتىقشىلىق بەرسە، تاعى ءبىرى وعان نارازى»، – دەدى توقاەۆ.
پرەزيدەنتتىڭ ايتۋىنشا باستاپقىدا سالىق جەڭىلدىگى ەكونوميكانىڭ بەلگىلى ءبىر سالالارى مەن بيزنەستىڭ ناقتى ساناتتارىن قولداۋ ماقساتىندا ەنگىزىلگەن. بىراق كاسىپكەرلەر جەڭىلدىكتى باس پايداسىنا جاراتىپ، سالىقتان جالتارىپ، بيزنەستەرىن بولشەكتەي باستاعان.
«مۇنداي جاعدايعا ءبىز جول بەرە المايمىز. قازاقستان جاپپاي وفشور ايماعىنا اينالىپ كەتپەۋى كەرەك. مۇنىڭ ءبارى سالىقتى باسقارۋ جۇيەسىن كۇردەلەندىرىپ، سالىق جۇكتەمەسى ادىلەتسىز بولىنەتىن جاعدايعا اكەپ سوقتى. قازىر پارلامەنتتە مۇلدەم جاڭا سالىق كودەكسى قارالىپ جاتىر. اتالعان قۇجات بيزنەستىڭ دە، مەملەكەتتىڭ دە مۇددەسىن ەسكەرىپ، كاسىپكەرلەردى سالىقتى دۇرىس تولەۋگە ىنتالاندىرۋعا ءتيىس. قوسىمشا سالىق تۇسىمدەرى دامۋ بيۋدجەتىن ۇلعايتىپ، جاڭا مەكتەپتەر، اۋرۋحانالار جانە باسقا دا الەۋمەتتىك نىساندار سالۋعا مۇمكىندىك بەرەدى. اشىق جانە تۇراقتى سالىق جۇيەسى ەلىمىزدىڭ ينۆەستيتسيالىق الەۋەتىن كۇشەيتەدى»، – دەدى ول.
قازاقستان ۇكىمەتى جاڭا سالىق كودەكسىن دايىنداپ، پارلامەنت قاراۋىنا ۇسىندى. 9 ساۋىردە ءماجىلىس قۇجاتتى ءبىرىنشى وقىلىمدا ماقۇلدادى.
سوعان سايكەس، قوسىلعان قۇن سالىعىنىڭ مولشەرىن 16 پايىزعا دەيىن كوتەرىپ، ققس-قا تىركەۋ شەگىن 40 ملن تەڭگەگە دەيىن تومەندەتۋ كوزدەلگەن. ياعني، جىلدىق قارجى اينالىمى 40 ملن تەڭگەدەن اساتىن كاسىپكەر قوسىلعان قۇن سالىعىن تولەۋى كەرەك بولادى. بۇل رەتتە حالىققا قىزمەت كورسەتەتىن كاسىپكەرلەرگە قوسىلعان قۇن سالىعى سالىنبايدى.
ودان بولەك، 128 سالىق جەڭىلدىگى جويىلىپ، 3 قانا سالىق رەجيمى قالادى.
