قازاقستاندا كيبەرقاۋىپسىزدىك تۋرالى جەكە زاڭ بولادى. بۇل تۋرالى ءماجىلىستىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«تسيفرلىق كودەكستە قاۋىپ-قاتەرلەردى باسقارۋعا، اقپاراتتى قورعاۋعا جانە كيبەرقاۋىپسىزدىككە قاتىستى جاڭا تاسىلدەر بەلگىلەنەدى. كيبەرقىلمىسپەن تيىمدىرەك كۇرەسۋ ءۇشىن «اقپاراتتاندىرۋ تۋرالى» زاڭ «كيبەرقاۋىپسىزدىك تۋرالى» دەپ وزگەرتىلەدى»،—دەلىنگەن حابارلامادا.
جوبادا تسيفرلىق سايكەستىك مەحانيزمى – سەنىمدى تسيفرلىق ورتانى دامىتۋدىڭ ءوزىن-ءوزى رەتتەۋ مەحانيزمى قاراستىرىلعان. سونداي-اق ول ستراتەگيالىق ماڭىزى بار جانە شەتەلدىكتەرگە بەرىلمەيتىن ۇلتتىق تسيفرلىق اكتيۆتەر – ۇكىمەتتىك جيىلىكتەر، دەرەكقورلار، جۇيەلەر جانە ينفراقۇرىلىم ءۇشىن قۇقىقتىق نەگىزدى ناقتىلايدى.
نەگىزگى جاڭالىقتىڭ ءبىرى – تسيفرلىق شەشىمدەردىڭ ساپاسىن، اشىقتىعىن جانە قاۋىپسىزدىگىن قامتاماسىز ەتەتىن ءۇش دەڭگەيلى اۋديت جۇيەسى. ولار:
– فۋنكتسيونالدى اۋديت – جۇيەلەردىڭ تيىمدىلىگىن جانە ولاردىڭ قويىلعان ماقساتقا، اسىرەسە، جاساندى ينتەللەكت سالاسىنا سايكەستىگىن تەكسەرەدى;
– كيبەرقاۋىپسىزدىك ءاۋديتى – تسيفرلىق ينفراقۇرىلىمنىڭ سىرتقى جانە ىشكى قاۋىپسىزدىگىن باعالايدى;
– رەتتەۋشى اۋديت – تسيفرلىق رەتتەۋدىڭ دەڭگەيى مەن جاڭا زاڭنامالىق بازاعا سايكەستىگىن تالدايدى.
بۇل شارالار سەنىم مەن جاۋاپكەرشىلىككە نەگىزدەلگەن تۇراقتى، قاۋىپسىز جانە اشىق تسيفرلىق ەكوجۇيە قۇرۋعا باعىتتالعان.
