دەپۋتات مەملەكەتتىك اتاقتى ساتىپ الۋعا بولاتىنىن ايتىپ، قورلىققا تەڭەدى، دەپ حابارلايدى "ادىرنا" ءتىلشىسى.
"Amanat" پارتياسى فراكتسياسىنىڭ مۇشەسى امانجول ءالتاي تامارا دۇيسەنوۆاعا ۇلتتىق سيمۆولوگيا ورتالىعىن قۇرۋ تۋرالى دەپۋتاتتىق ساۋال جولدادى.
ماجىلىسمەن مەملەكەتتىك رامىزدەردى تەرەڭ تانۋ مەن قادىرلەۋ كەرەكتىگىن ايتىپ، ۇندەۋ جاسادى.
“مەملەكەتتىك رامىزدەر – تاۋەلسىز ەلىمىزدىڭ بەينەسىن تانىتاتىن سيمۆولدىق ءمان-ماعىناعا يە قاستەرلى ۇعىم. بىراق مەملەكەتتىك ناگرادالاردىڭ اتاۋىن، كەيبىر ەلەمەنتتەرىن قايتالايتىن تۇسىنىكسىز ۇيىمداردىڭ ءمان-ماعىناسى جوق وردەن-مەدالدارى، جالعان اتاقتارى جاۋىننان كەيىنگى ساڭىراۋقۇلاقتاي قاپتاپ كەتكەنى شىن", – دەدى دەپۋتات امانجول ءالتاي.
دەپۋتاتتىڭ ايتۋىنشا مەملەكەتتىك اتاقتاردى ساتىپ الۋعا بولادى. الايدا مۇنداي ارەكەتتەر ەلدىككە سىن ەكەنىن ايتادى.
"وسى رەتتە، ادىلەتتى كەلەشەككە قادام باسقىمىز كەلسە، ساتىلاتىن ءمانسىز ماراپاتتاردان قوعامدى ساقتاندىرۋ ماڭىزدى. مەملەكەتتىك رامىزدەرىمىزدى رەتسىز قولدانىپ، جالعان اتاقتار مەن قۇنسىز سولكەبايلاردى ساتىپ پايدا تاپقىش پىسىقايلاردىڭ ارەكەتتەرىنە قۇقىقتىق نەگىزدە تيىم سالۋ كەرەك. بۇل ءبىر.
ەكىنشىدەن، رامىزدەر ماسەلەسىندە ءالى دە ويلاستىرۋدى، ورتاق شەشىمگە كەلۋدى قاجەت ەتەتىن تۇيتكىلدەر بار. بىزدەگى تۇيتكىلدەردىڭ ءبىر ۇشى اتاۋعا بايلانىستى. گەرالديكا – گەربتەر مەن ولاردى قولدانۋ داستۇرلەرىن عانا زەرتتەيتىن ارنايى تاريحي ءپان.
ياعني گەرالديكانىڭ نىسانى – تەك قانا گەربتەر.
ال، ءرامىزتانۋ - بۇدان كەڭ اۋقىمداعى زەرتتەۋلەردى قاجەت ەتەتىن سالا. سوندىقتان بۇل جۇمىستارمەن اينالىساتىن مەكەمەنى «گەرالديكالىق زەرتتەۋ ورتالىعى» دەپ ەمەس، «ۇلتتىق ءرامىزتانۋ ورتالىعى» دەپ اتالعانى ءجون.
ويتكەنى، ءرامىزتانۋ نىسانىندا مەملەكەتتىك رامىزدەرمەن قاتار، ەرتەدەگى سيمۆولدىق تاڭبالاردان باستاپ، ويۋ-ورنەكتەر تىلىنە دەيىن قامتىلادى جانە ولاردىڭ رامىزدىك ءمان-ماعىنالارى اشىلادى.
رامىزدەر ماسەلەسىن ءوز ەلىنىڭ تاريحىمەن ساباقتاستىرا قاراستىرۋ الەمنىڭ جاپونيا، فرانتسيا سياقتى دامىعان ەلدەرىنىڭ تاجىريبەسىندە بار. وسىعان وراي، ءبىزدىڭ ءرامىزتانۋ ارنايى عىلىم رەتىندە قالىپتاساتىن ۋاقىت كەلدى", - دەيدى ماجىلىسمەن.
دەپۋتات امانجول ءالتاي ءوز ساۋالىنا زاڭنامادا بەلگىلەنگەن مەرزىم ىشىندە جازباشا جاۋاپ كۇتەتىنىن ايتتى.
- مەملەكەت باسشىسى قاسىم - جومارت كەمەلۇلىنىڭ ۇلتتىق قۇرىلتايدا ايتقان تاپسىرماسىنان ناتيجە شىعارىپ، ايماقتار مەن قالالاردىڭ تاڭباسىن الەمدىك ستاندارتتار نەگىزىندە بىرىڭعاي ۇلگىگە يكەمدەپ ازىرلەۋ جانە بەكىتۋ ءتارتىبىن رەتكە كەلتىرگەن ءجون.
- قازىرگى گەرالديكالىق زەرتتەۋ ورتالىعىنىڭ اتاۋىن «ۇلتتىق ءرامىزتانۋ ورتالىعى» دەپ وزگەرتۋ ماسەلەسى قاراستىرىلسىن.
- رامىزدەردى عىلىمي تۇرعىدا زەرتتەپ، جۇيەلەۋ ىسىنە رامىزتانۋشىلارمەن قاتار، تاريح، ارحەولوگيا، ەتنوگرافيا سالالارىنىڭ ماماندارىن دا كەڭىنەن تارتۋ قاجەت.
- مەملەكەتتىك رامىزدەر ارقىلى قوعامدا پاتريوتتىق سەزىمدى ورنىقتىرۋ ءۇشىن بالاباقشادان باستاپ، مەكتەپ، كوللەدج، جوو-دا ءرامىزتانۋ بويىنشا ارناۋلى تاربيەلىك ءىس-شارالار جوسپارلى تۇردە جۇيەلى وتۋگە ءتيىس.
- مەملەكەتتىك رامىزدەردىڭ ەلەمەنتتەرىن، مەملەكەتتىك ناگرادالاردىڭ جانە اتاقتاردىڭ اتاۋىن قايتالالايتىن ارەكەتتەرگە قۇقىقتىق توسقاۋىل قويۋ كەرەك.
