"ەل اراسى تاتۋ، مەملەكەتتىڭ ىرگەسى ءبۇتىن بولسىن دەسەك، "قىرىلعانشا" جۇمىلايىق". وسى كۇنگە دەيىن العا باسپاعانىمىز ءبىر-ءبىرىمىزدى اياقتان تارتقاننىڭ كەسەلى عوي". بۇل پىكىردى قر پارلامەنتى ءماجىلىسى دەپۋتاتتىعىنا ۇمىتكەر رينات زايتوۆ مالىمدەدى، دەپ جازادى "ادىرنا" ۇلتتىق پورتالى.
"قۇرمەتتى تۋىستار. قارعا تامىرلى قازاق بالاسى ءار سايلاۋ سايىن نەگە جاۋلاسادى؟ ايتىڭىزدارشى. نە قۋىپ، نەنى كوكسەپ ءجۇرمىز؟ كەلىسەمىن. وتكەن كەزەڭدە وكىنىش از ەمەس. بىراق، نە سەبەپتەن ءبىز ءبىر كۇندىك بايگەگە بولا ءجۇز جۇيرىكتى الالاپ جاتىرمىز؟ وسى كۇنگە دەيىن العا باسپاعانىمىز ءبىر-ءبىرىمىزدى اياقتان تارتقاننىڭ كەسەلى عوي. اعايىندار-اۋ بىرىگەتىن كەزىمىز كەلدى عوي؟! وڭعار قابدەن باۋىرىم "نار تاۋەكەل"- "نۇر تاۋەكەل"-دەپ مۇقاتتى. يا كەيبىر باۋىرلارىم ءۇشىن ءبىر ءارىپتى وزگەرتۋدە تۇرعان ەشتەڭە جوق شىعار.... وزىمە ولاي ەمەس. ءبىر ءارىپتىڭ ماڭىزى وتە زور. ويتكەنى، ءبىر ءارىپتى وزگەرتسەڭ كوووپ ماعىنا وزگەرەدى. مىسالى: قازاقتىڭ ءبىر ءارپىن وزگەرتسە -مازاق، نامىستىڭ ءبىر ءارپىن وزگەرتسە - قامىس بولادى، سوندىقتان مەن ءۇشىن امانات پەن جاماناتتىڭ، نار مەن نۇردىڭ، قوشانوۆ پەن قوسانوۆتىڭ (دۇشپاندارعا سىيلىق) ايىرماسى وتە ۇلكەن. ارىپپەن الىسقانشا، حالىقپەن تابىسايىق. قولىمىزدان كەلسە جۇلىسقانشا ۇعىسايىق! قالعانى جاراتقاننىڭ قۇزىرىندا. ءبىز ءۇشىن بۇل سايلاۋ - ەلدى جۇمىلدىراتىن ءبىر ناۋقان. شاتاسپاڭىزدار", - دەپ جازدى زايتوۆ.
رينات زايتوۆتىڭ ايتۋىنشا، ماقساتى ءبىر ادامدار ءوزارا ارازداسپاي، بەرەكە-بىرلىكتە بولۋى ماڭىزدى.
"مەن بارىڭىزگە تىلەكشىمىن. ءاربىر تاۋەلسىز كانديداتتىڭ، ءاربىر پارتيانىڭ قۇداي ماڭدايىنا جازعان ءوز جولى بار. دەگەنمەن، ءبارىمىزدىڭ تىلەگىمىز بىرەۋ شىعار؟ ەل اراسى تاتۋ، مەملەكەتتىڭ ىرگەسى ءبۇتىن بولسىن دەسەك، "قىرىلعانشا" جۇمىلايىق. ءسوز جوق مەن- AMANAT پارتياسىنىڭ باعدارلاماسىن جاقتاۋشىمىن(ارعىسىن كورەرمىز.) ويتكەنى AMANAT پارتياسىنىڭ باعدارلاماسىندا مەنىڭ كوپ تىلەگىم ورىن تاۋىپتى. ەندى سونى جۇزەگە اسىرۋعا بار كۇشىمىزدى جۇمساۋىمىز قاجەت. ايتەۋىر ءۇمىت-تىلەگى ءبىر پىكىرلەستەرىمنىڭ جانىندامىن. ەرتەڭىمە دەگەن كىشكەنتاي سەنىم بار. كۇمانىم جوق بۇيىرتىپ، پارلامەنت تورىنە ەلىنە جانى اشيتىن، جۇرەگىنىڭ قاعىسى- ارام تابىسىنىڭ ارباۋىنا باعىنبايتىن ادامدار كەلسە، مەملەكەتتىڭ بولاشاعى بولادى! تەك ونداي ادامدار ءبىر پارتيا نەمەسە ءبىر ۇيىمدا توپتاسپاعان (سەبەبى كوپ). ءبىر بىلەرىم، ماقساتى ءبىر ادامداردىڭ ارازداسۋى مۇمكىن ەمەس! قۇداي ءۇشىن، ەل ءۇشىن ءبىر اي شىداپ، بارلىق الەمگە ىنتىماعىمىزدىڭ بارىن كورسەتەيىكشى. ءبىر ۇمىتكەردى تورگە شىعارامىن دەپ، باسقالارىن كورگە تىعۋدى ادەت قىلمايىقشى. بارلىعى ءبىر قۇدايدىڭ قولىندا. ءادىل سايلاۋ بولسا، ءادىل قوعام قالىپتاساتىنى انىق! بارلىق ۇمىتكەرلەرگە ساتتىلىك تىلەيمىن! نار تاۋەكەل!", - دەدى زايتوۆ.
"ادىرنا" ۇلتتىق پورتالى
