ەكونوميست ءارى بلوگەر، قازاقتىڭ باسپانا ماسەلەسىن شەشۋ جولىندا حالىققا تانىلعان داۋلەت مۇقاەۆ قر پارلامەنتى ءماجىلىسى دەپۋتاتتارىنىڭ سايلاۋىنا ءتۇسىپ جاتىر. ۇمىتكەر ءوز شەشىمى جايلى الەۋمەتتىك جەلىدە حابارلادى، دەپ جازدى "ادىرنا" ۇلتتىق پورتالى.
- حالىق سۇراسا، حان تۇيەسىن سويادى. وزدەرىڭىز بىلەتىندەي مەن وسى ۋاقىتقا دەيىن “دەپۋتاتتىققا سايلانبايمىن” دەپ بىرنەشە مارتە سۇحبات بەرگەنمىن. دەسە دە ء“سىز دەپۋتات بولۋعا لايىقسىز” دەگەن تولاسسىز حات جازىپ، “داۋلەت دەپۋتات بولسىن” دەپ، پەتيتسياعا قول قويعان قولداۋشىلارىمنىڭ قاتارى دا از بولمادى. حالىقتىڭ ۇنىنە قۇلاق اسىپ، قامىن پارلامەنتتە ويلايتىن كەز كەلگەن سياقتى… ءارى جاڭا قازاقستان، جاستار، وزگەرىس دەپ جاتىرمىز. جاسىم بولسا وردا بۇزار 30-دان استى.
بۇيىرسا، 19 ناۋرىز كۇنى وتەتىن سايلاۋعا قر ءماجىلىس دەپۋتاتتىعىنا كانديدات رەتىندە ءوزىمدى ۇسىنىپ وتىرمىن. ەشبىر پارتيا اتىنان ەمەس. استانا قالاسىنىڭ ەسىل جانە سارىارقا اۋداندارىنىڭ #2 بىرمانداتتىق اۋماقتىق سايلاۋ وكرۋگىنەن ۇمىتكەرمىن.
وسى ۋاقىتقا دەيىن “الدىن الا ۇگىت-ناسيحات شارالارى ءجۇرىپ، زاڭبۇزۋشىلىق بولىپ كەتپەسىن” دەپ ەشبىر جەردە جاريالامادىم. ءدال قازىرگى ۋاقىتتا اۋەلى اللانىڭ، ەكىنشى اتا-انامنىڭ قولداۋىمەن ءوز شتابىمدى جاساقتاپ، بايگەگە تۇسۋگە ساقاداي سايمىن، - دەدى داۋلەت مۇقاەۆ.
Cونىمەن قاتار، داۋلەت مۇقاەۆ وقىرماندارىنان قولداۋ تانىتۋىن سۇراپ، ادىلەتتى سايلاۋدان ءۇمىتتى ەكەندىگىن جەتكىزدى.
- باسقا كانديداتتار ۆيدەوروليككە ارنايى تاپسىرىس بەرىپ جاتسا، مەن وسى ۋاقىتقا دەيىن “قازاقتىڭ داۋلەتى” دەپ قولداپ كەلگەن قاراپايىم جاندارمەن ۆيدەو تۇسىرگىم كەلەدى.
وسى رەتتە:قۇرمەتتى مەنىڭ جاقتاستارىم سىزدەردى بۇگىن ساعات 21:00-دە استانامىزدىڭ بوتانيكالىق باعىندا (تۇركىستان كوشەسى جاعىنان ورتالىق كىرەبەرىس) جينالىپ، قولداۋ ۆيدەو تۇسىرۋگە شاقىرامىن!!! استانالىق وقىرماندارىم، كەلىڭىزدەر. جينالايىق. كەزەكتى بايگەگە تۇسكەلى وتىرعان سايگۇلىگىڭىزدى قولداپ جىبەرىڭىزدەر! مەنىڭ كۇتەتىنىم ادىلەتتى سايلاۋ، - دەپ حالىققا ءوتىنىشىن جەتكىزدى ەكونوميست.
"ادىرنا" ۇلتتىق پورتالى
