الەۋمەتتىك جەلىدە ەلوردا كوشەلەرىن ءوز قولىمەن جاساعان ەلەكتربوردپەن ارالاعان جىگىتتىڭ ۆيدەوسى تارادى، دەپ حابارلايدى «ادىرنا» ءتىلشىسى Tengri Life-قا سىلتەمە جاساپ.
28 جاستاعى ارىستان ءتىپتى قىس كەزىندە دە كوشەدە جۇرە الاتىن ەلەكترسكەيت نۇسقاسىن جاساعان. ايتۋىنشا، ول بۇل كولىك قۇرالىن ەكىنشى جىل قاتارىنان قولدانىپ كەلەدى.
ونەرتاپقىش قازىرگى تاڭدا ينجەنەر-جوبالاۋشى بولىپ جۇمىس ىستەيدى.
«بۇل — تولىقتاي اۆتورلىق جوبا ەمەس، كوبىرەك ىڭعايلىلىق پەن سەنىمدىلىكتى ارتتىرۋعا باعىتتالعان تيۋنينگ. سكەيت قولىما وتە ناشار كۇيدە ءتۇستى . ونى تۇگەلدەي بولشەكتەپ، ۇساق بولشەگىنە دەيىن اۋىستىردىم. جيناۋعا شامامەن ءبىر اپتا كەتتى. كەيبىر بولشەكتەردى 3D-پرينتەرمەن باسىپ شىعاردىم، قالعاندارىن ءارتۇرلى جەردەن تاپسىرىسپەن الدىم. قۇرىلعى پۋلت ارقىلى باسقارىلادى، وندا گاز جانە تەجەۋ تەتىكتەرى بار»، — دەيدى ول.
ارىستان ءۇشىن گادجەتتەردى جاساۋ مەن جەتىلدىرۋ — جان تىنىشتىعى. ول نەگىزگى جۇمىسىنىڭ تەحنيكالىق ءارى شىعارماشىلىق كۇشتى كوپ قاجەت ەتەتىنىن، سوندىقتان كەيدە رۋحاني دەمالىس رەتىندە وسىنداي ىسپەن اينالىسۋدى ۇناتاتىنىن مالىمدەدى.
ءبىر قىزىعى، ارىستاننىڭ الەۋمەتتىك جەلىلەردە جەكە پاراقشالارى جوق. ايتۋىنشا، وعان ۋاقىت جەتىسپەيدى.
«جۇبايىم ۇنەمى: «بلوگ جۇرگىز، سەندە قىزىق جۇمىس بار عوي، كۇردەلى نارسەلەردى قاراپايىم تىلمەن جاقسى تۇسىندىرەسىڭ»،– دەيدى. ازىرگە ويلانىپ ءجۇرمىن»، — دەدى ارىستان.
كەلەشەكتە ول جاڭا قۇرىلعىلاردى قۇراستىرۋ مەن جاساۋدى جالعاستىرۋدى جوسپارلاپ وتىر.
