بۇل تۋرالى ورتالىق كوممۋنيكاتسيالار قىزمەتىنىڭ بريفينگىندە اباي وبلىسىنىڭ اكىمى بەرىك ءۋالي باياندادى.
اباي وبلىسىندا ينۆەستيتسيا تارتۋ جانە ءوڭىردىڭ ونەركاسىپتىك الەۋەتىن ارتتىرۋ باعىتىندا جۇيەلى جۇمىستار جۇرگىزىلۋدە. جىل باسىنان بەرى وبلىس اكىمى بەرىك ءۋالي 100-دەن استام شەتەلدىك ينۆەستورمەن كەزدەستى. حالىقارالىق ەكونوميكالىق ىنتىماقتاستىقتى نىعايتۋ ماقساتىندا «ۇلكەن التاي» حالىقارالىق سۋبوڭىرلىك كونفەرەنتسياسى اياسىندا قىتاي حالىق رەسپۋبليكاسىنىڭ ءىرى كومپانيالارىمەن جالپى قۇنى 1,5 ميلليارد اقش دوللارىن قۇرايتىن 15 مەموراندۋمعا قول قويىلدى. بۇل كەلىسىمدەر لوگيستيكا، تۋريزم، وڭدەۋ ونەركاسىبى جانە باسقا دا ماڭىزدى باعىتتاردى قامتيدى.
«قازىرگى ۋاقىتتا قىتايلىق سەرىكتەستەردىڭ قاتىسۋىمەن جالپى قۇنى 39,5 ملرد تەڭگەنى قۇرايتىن 3 جوبا ىسكە اسىرىلا باستادى. سونىمەن قاتار، وڭىردەن شىققان تانىمال تۇلعالار، كاسىپكەرلەر مەن مەتسەناتتاردىڭ قاتىسۋىمەن وتكەن «تۋعان جەرگە تۋىڭدى تىك» ينۆەستيتسيالىق فورۋمىندا جالپى سوماسى 336 ملرد تەڭگەگە 15 ماڭىزدى كەلىسىم جاسالدى. ونىڭ ىشىندە جالپى سوماسى 31,7 ملرد. تەڭگەنى قۇرايتىن 2 جوبانى ىسكە اسىرۋ باستالدى. بۇل فورۋم وبلىستىڭ ينۆەستيتسيالىق تارتىمدىلىعىن ارتتىرۋعا جانە جەرگىلىكتى بيزنەستىڭ جاڭا سەرپىن الۋىنا ىقپال ەتتى»، – دەدى وبلىس اكىمى.
يندۋستريالىق ينفراقۇرىلىمدى دامىتۋ باعىتىندا دا اۋقىمدى جۇمىستار جۇرگىزىلۋدە. سەمەي قالاسىنداعى اۋماعى 96 گەكتاردى قۇرايتىن ء«وندىرىس» يندۋستريالىق ايماعىندا 3 جاڭا جوبالارعا جەر بەرىلىپ، تولىق يگەرىلدى. يندۋستريالىق ايماقتى 186 گەكتارعا دەيىن كەڭەيتىپ، شاعىن ونەركاسىپ پاركىن قۇرۋ جۇمىستارى قولعا الىنىپ جاتىر.
وڭىرگە ينۆەستورلاردىڭ قىزىعۋشىلىعى جوعارى. وسىعان وراي سەمەي قالاسىنىڭ ونەركاسىپتىك ايماعىندا ارنايى ەكونوميكالىق ايماق قۇرۋ ءۇشىن 500 گەكتار جەر ءبولۋ جوسپارلانۋدا. بۇل جوبا جاڭا ءوندىرىس ورىندارىن اشۋعا، جۇمىس ورىندارىن كوبەيتۋگە جانە ءوڭىردىڭ تۇراقتى ەكونوميكالىق دامۋىنا سەرپىن بەرەدى.
