الماتى قالاسىنىڭ قوعامدىق دەنساۋلىق ساقتاۋ باسقارماسى «حان-ءتاڭىرى» كومانداسىنىڭ 19 جاستاعى فۋتبولشىسى دياس تولەۋدىڭ اۋرۋحاناعا قانداي جاعدايدا جەتكىزىلگەنىن حابارلادى، دەپ حابارلايدى "ادىرنا".
ول قازاقستان چەمپيوناتىنىڭ ءبىرىنشى ليگاسى اياسىنداعى ويىن كەزىندە ءوزىن ناشار سەزىنىپ، قىزمەتكەرلەر ونى الاڭنان كوتەرىپ الىپ كەتكەن. ۆەدومستۆو مالىمەتىنشە، فۋتبولشى كلينيكالىق ءولىم جاعدايىندا اۋرۋحاناعا جەتكىزىلگەن.
"الماتى قالالىق ورتالىق كلينيكالىق اۋرۋحاناسىنىڭ قابىلداۋ بولىمىنە 2006 جىلى تۋعان پاتسيەنت كلينيكالىق ءولىم جاعدايىندا جەتكىزىلدى. ونى ماتچ كەزىندە كەزەكشىلىكتە بولعان جەكە مەديتسينالىق جەدەل جاردەم كولىگى الىپ كەلگەن. قابىلداۋ كەزىندە جۇرەك سوعىسى مەن قان قىسىمى بولماعان، قاراشىقتارى كەڭەيگەن. مەديتسينالىق بريگادا 30 مينۋت بويى رەانيماتسيالىق شارالار جۇرگىزگەنىمەن، ءومىر بەلگىلەرىن قالپىنا كەلتىرۋ مۇمكىن بولمادى. بيولوگيالىق ءولىم تىركەلدى", — دەپ حابارلادى قوعامدىق دەنساۋلىق ساقتاۋ باسقارماسى.
قازىر ويىنشىنىڭ دەنەسى ءولىمنىڭ ناقتى سەبەبىن انىقتاۋ ءۇشىن سوت-مەديتسينالىق ساراپتاماعا جىبەرىلدى.
ەسكە سالايىق، كەشە «حان-ءتاڭىرى» كلۋبىنىڭ شابۋىلشىسى ويىن كەزىندە جاعدايى ناشارلاپ، كءوز جۇمعان بولاتىن.
