جەزقازعان قالاسىنىڭ كوپسالالى اۋرۋحاناسىندا العاش رەت زاماناۋي رەتروگرادتىق بۇيرەك ىشىلىك حيرۋرگيا ادىسىمەن وتا ءساتتى جاسالدى.
ۇلىتاۋ وبلىسى جەزقازعان قالاسىنىڭ كوپسالالى اۋرۋحاناسىنىڭ ۋرولوگيالىق بولىمشەسىندە العاش رەت از ءينۆازيۆتى ادىسپەن بۇيرەككە وپەراتسيا جاسالدى. بۇعان جەرگىلىكتى بيۋدجەت ەسەبىنەن 15 ميلليون تەڭگەگە ساتىپ الىنعان جاڭا مەديتسينالىق جابدىق — مونيتورى بار يكەمدى ۋرەتەرورەنوسكوپ مۇمكىندىك بەردى.
قاراعاندىدان كەلگەن تاجىريبەلى ۋرولوگ سەرىك ءجۇنىسوۆ جەزقازعاندىق دارىگەرلەرگە ماستەر-كلاسس وتكىزىپ، ءتورت ناۋقاسقا ءساتتى وپەراتسيا جاسادى. ءار وپەراتسيا شامامەن 30–40 مينۋتقا سوزىلىپ، پاتسيەنتتەر ەكى كۇننەن كەيىن ۇيلەرىنە جىبەرىلدى.
العاشقى ناۋقاستاردىڭ ءبىرى – زەينەتكەر قۇلپان تۇيەباەۆا. ونىڭ بۇيرەگىنەن 2 سانتيمەترلىك تاس الىنىپ تاستالدى. ەكى جىل بويى بەلى اۋىرىپ كەلگەن ول جاڭا ءادىستىڭ ارقاسىندا كۇردەلى وپەراتسياسىز ساۋىعىپ شىقتى.
وبلىستىق اۋرۋحانانىڭ ۋرولوگى ءسابيت اتاباەۆتىڭ ايتۋىنشا، جاڭا ءادىس ەندى تۇراقتى تۇردە قولدانىلاتىن بولادى. ءمامس شەڭبەرىندە اي سايىن 10–15 وپەراتسيا جاساۋ جوسپارلانىپ وتىر. مۇنداي وپەراتسيالار ەندى وبلىس تۇرعىندارى ءۇشىن تەگىن، قاۋىپسىز جانە ءتيىمدى مەديتسينالىق كومەك رەتىندە قولجەتىمدى بولادى.
بۇل – وڭىرلىك مەديتسينا ءۇشىن ماڭىزدى قادام. بۇعان دەيىن مۇنداي جوعارى تەحنولوگيالىق وتالار تەك ءىرى قالالاردا جاسالسا، ەندى ۇلىتاۋ وبلىسىنىڭ تۇرعىندارى دا تۇرعىلىقتى جەرىندە ساپالى ەم الا الادى.
جاڭا ءادىس رەتروگرادتىق بۇيرەك ىشىلىك حيرۋرگيا كەسۋسىز جانە تەسۋ جاساماي، ناۋقاستىڭ دەنەسىندە تىرتىق قالدىرماي تاستاردى الۋ ءتاسىلى بولىپ تابىلادى. بۇل پروتسەدۋرا كەزىندە ۋرەتەروسكوپ ناۋقاستىڭ ءزار شىعارۋ جولى ارقىلى ەنگىزىلىپ، بۇيرەككە دەيىن كوتەرىلەدى. لازەردىڭ كومەگىمەن تاستار ۇساق بولشەكتەرگە ءبولىنىپ، سىرتقا شىعارىلادى.
