ەلىمىزدە كونستيتۋتسيالىق رەفورمالار كەزەڭى جالعاسىپ، بيلىك تارماقتارىنىڭ وكىلەتتىكتەرى ناقتىلانۋدا. وسى وزگەرىستەردىڭ ماڭىزدىلىعى مەن جاڭا زاڭ جوبالارىنىڭ ءمانى تۋرالى ءماجىلىس دەپۋتاتى ابزال قۇسپان پىكىر ءبىلدىردى، دەپ حابارلايدى «ادىرنا» ءتىلشىسى.
«نەگىزگى ماسەلە – كونستيتۋتسياداعى وزگەرتۋلەر. مىسالى، بىزدە كونستيتۋتسياداعى وزگەرىستەر بويىنشا كوپ سىن ايتىلادى، كەيدە امەريكامەن سالىستىرىپ جاتادى. سول كەزدە مەن ادەتتە ديناميكاعا نازار اۋدارۋدى سۇرايمىن. 2022 جىلعا دەيىنگى وزگەرتۋدىڭ بارلىعى پرەزيدەنتتىڭ وكىلەتتىگىن كۇشەيتۋگە باعىتتالعان بولسا، 2022 جىلعى وزگەرتۋلەردى بارلىعىمىز بىلەمىز دەپ ويلايمىن، رەفەرەندۋمدا قابىلدانعان شەشىم – پرەزيدەنتتىڭ وكىلەتتىگىن ازايتىپ، كەرىسىنشە پارلامەنتتىڭ وكىلەتتىگىن ۇلعايتۋعا باعىتتالدى. ەندى وسى باعىتتاعى جۇمىس ءالى دە جالعاسىن تابادى دەپ ويلايمىز. كۇنى كەشە عانا مەملەكەت باسشىسى بۇل تۋرالى پىكىرىن ءبىلدىردى جانە كونستيتۋتسياعا وزگەرىستەر ەنگىزۋ تۋرالى ارنايى توپ قۇرىلدى»، – دەدى ابزال قۇسپان.
سونىمەن قاتار دەپۋتات قۇقىق بۇزۋشىلىق پروفيلاكتيكاسىنا ارنالعان جاڭا زاڭ جوباسىنىڭ ماڭىزىنا دا توقتالدى.
«بۇل زاڭنىڭ ەڭ باستى ەرەكشەلىگى – بۇرىنعى ءار كودەكستە جانە ءتۇرلى زاڭداردا شاشىلىپ جاتقان وكىلەتتىكتەردى ءبىر زاڭنىڭ اياسىندا بىرىكتىرۋىندە. ياعني، الەۋمەتتىك كودەكستەر، ءبىلىم تۋرالى زاڭ، قۇقىق قورعاۋ ورگاندارىنا قاتىستى زاڭدار – وسىلاردىڭ بارلىعى بىرىكتىرىلىپ، ءبىر زاڭ اياسىندا قاراستىرىلادى. بۇل زاڭنىڭ ەڭ باستى ەرەكشەلىگى وسىندا جاتىر»، – دەدى حالىق قالاۋلىسى.
