دەنساۋلىق ساقتاۋ ءمينيسترى الەكسەي تسوي ۆاكتسيناعا قارسى كەلىنشەكتەردىڭ ۆيتسە-ءمينيستردى سوققىنىڭ استىنا العانى تۋرالى تۇسىنىكتەمە بەردى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
دەنساۋلىق ساقتاۋ ءمينيسترى نە سەبەپتى اشىنعان انالاردىڭ الدىنا شىقپاعانى تۋرالى مالىمدەدى. تسوي ءدال ول ۋاقىتتا بوس بولماعانىن جەتكىزدى.
«ءبىزدى ءتۇسىندىرۋ جۇمىستارى جۇرگىزىلىپ جاتىر. مەن دە، ۆيتسە-مينيسترلەر دە حالىقپەن تىعىز جۇمىس جاساپ جاتىرمىز. بىزدە كەزدەسۋدىڭ ناقتى گرافيگى بار. ءدال سول ساتتە بوس بولعان ماماندار شىعىپ، حالىققا تۇسىنىكتەمە بەردى. دەپارتامەنت باسشىلارىنان بولەك، ۆيتسە-مينيسترلەر دە حالىقپەن بايلانىس ورناتىپ، مۇڭ-مۇقتاجدارىن تىڭدادى. بۇكىل مينيسترلىك ءتۇسىندىرۋ جۇمىستارىن جۇرگىزۋ ءۇشىن قولدان كەلگەنىن جاساپ جاتىر. مەن حالىقپەن كەزدەسۋگە دايىنمىن»، – دەيدى تسوي.
ەسكە سالساق، تۇرعىندارمەن كەزدەسۋگە دەنساۋلىق ساقتاۋ ۆيتسە-مينيسترلەرى جاندوس بۇركىتباەۆ، اجار عينيات جانە قازاقستاننىڭ باس سانيتار دارىگەرىنىڭ رەسمي وكىلى ەرجان بايتاناەۆ كەلگەن. الايدا ايەلدەر ولاردىڭ ءسوزىن تىڭداماي، شەنەۋنىكتەرگە جۇدىرىق الا جونەلگەن.
"ادىرنا" ۇلتتىق پورتالى
