قازاقستان رەسپۋبليكاسى قارجى مينيسترلىگىندە ورتالىق اپپاراتتىڭ، كوميتەتتەردىڭ جانە ۆەدومستۆوعا قاراستى ۇيىمداردىڭ قىزمەتكەرلەرى قاتىسقان ۆەلوشەرۋ جانە تيمبيلدينگ ءىس-شاراسى ءوتتى.
ءىس-شارا قازاقستان رەسپۋبليكاسىنىڭ جاڭا كونستيتۋتسياسى كۇشىنە ەنۋى قارساڭىندا ۇيىمداستىرىلىپ، ونىڭ نەگىزگى قۇندىلىقتارىن – زاڭ ۇستەمدىگىن، مەملەكەتتىڭ جاۋاپكەرشىلىگىن، ازاماتتار مەن بيزنەستىڭ قۇقىقتارىن قورعاۋدى، قوعامنىڭ بىرلىگى مەن ەل مۇددەسىنە قىزمەت ەتۋ قاعيداتتارىن ناسيحاتتاۋعا ارنالدى.
جاڭا كونستيتۋتسيا مەملەكەتتىك ينستيتۋتتاردىڭ قىزمەتىنە قويىلاتىن تالاپتاردىڭ جاڭا دەڭگەيىن ايقىندايدى. بۇل قارجى مينيسترلىگى جۇيەسى ءۇشىن ەرەكشە ماڭىزدى، ويتكەنى قارجى، سالىق، كەدەن، قازىناشىلىق جانە باقىلاۋ ورگاندارى جۇمىسىنىڭ ساپاسىنا ازاماتتاردىڭ سەنىمى، بيزنەستىڭ تۇراقتىلىعى، بيۋدجەتتىك ۇدەرىستەردىڭ اشىقتىعى جانە ەلدىڭ ينۆەستيتسيالىق تارتىمدىلىعى تىكەلەي بايلانىستى.
كونستيتۋتسيانىڭ ماڭىزدى باعدارلارىنىڭ ءبىرى – ازاماتتاردىڭ، كاسىپكەرلەر مەن ينۆەستورلاردىڭ قۇقىقتارىن قورعاۋ كەپىلدىكتەرىن كۇشەيتۋ. بۇل مەملەكەتتىك ورگاندار مەن ولاردىڭ لاۋازىمدى تۇلعالارىنىڭ زاڭسىز شەشىمدەرى، ارەكەتتەرى نەمەسە ارەكەتسىزدىگى ءۇشىن جاۋاپكەرشىلىگىن قامتيدى. مۇنداي ءتاسىل قۇقىقتىق ورتانىڭ بولجامدىلىعىن ارتتىرىپ، مەملەكەتتىك شەشىمدەردىڭ ساپاسىنا قويىلاتىن تالاپتاردى كۇشەيتەدى.
ۆەلوشەرۋ العا ۇمتىلۋدىڭ، بىرلىكتىڭ جانە قارجى مينيسترلىگى ۇجىمىنىڭ مەملەكەت الدىندا تۇرعان مىندەتتەردى ىسكە اسىرۋداعى ورتاق جاۋاپكەرشىلىگىنىڭ سيمۆولىنا اينالدى. مينيسترلىكتىڭ ءارتۇرلى بۋىن، قۇرىلىمدىق بولىمشە جانە ۆەدومستۆوعا قاراستى ۇيىم قىزمەتكەرلەرىنىڭ قاتىسۋى ساباقتاستىقتى، كوماندالىق رۋحتى جانە ورتاق ناتيجەگە بىرلەسىپ جۇمىس ىستەۋگە دايىن ەكەنىن كورسەتتى.
ۆەلوشەرۋ قورىتىندىسى بويىنشا قارجى ءمينيسترى ءمادي تاكيەۆ جەڭىمپازداردى ديپلومدارمەن جانە ەستەلىك سىيلىقتارمەن ماراپاتتاپ، قاتىسۋشىلارعا زور دەنساۋلىق، كاسىبي قىزمەتتەرىنە تابىس جانە جاڭا جەتىستىكتەر تىلەدى.
ايەلدەر اراسىندا جۇلدەلى ورىندارعا يە بولعاندار:
* I ورىن – ايگەرىم سادىبەك، مەملەكەتتىك قازىناشىلىق كوميتەتى;
* II ورىن – ءاليا داۋلەتباەۆا، «Digital Silk Road Company» جشس;
* III ورىن – ايگۇل سارسەمبەنوۆا، مەملەكەتتىك قازىناشىلىق كوميتەتى.
ەرلەر اراسىندا جۇلدەگەرلەر:
* I ورىن – ءالي قىزايباي، «ەلەكتروندىق قارجى ورتالىعى» اق;
* II ورىن – ايبەك رىمتاي، مەملەكەتتىك كىرىستەر كوميتەتى;
* III ورىن – قايرات سۇلتانبەكوۆ، «اقپاراتتىق-ەسەپتەۋ ورتالىعى» اق.
قارجى مينيسترلىگىندە كورپوراتيۆتىك مادەنيەتتى دامىتۋ، قىزمەتكەرلەردىڭ دەنساۋلىعىن نىعايتۋ جانە ءبىرتۇتاس كوماندانى قالىپتاستىرۋ ءتيىمدى مەملەكەتتىك قىزمەتتىڭ ماڭىزدى قۇرامداس بولىگى ەكەنى اتاپ ءوتىلدى. مۇنداي ءىس-شارالار ۇجىم ىشىندەگى سەنىمدى نىعايتۋعا، قۇرىلىمدىق بولىمشەلەر اراسىنداعى ءوزارا ءىس-قيمىلدى ارتتىرۋعا جانە ۆەدومستۆو الدىندا تۇرعان مىندەتتەردى ساپالى ورىنداۋعا ورتاق جاۋاپكەرشىلىكتى قالىپتاستىرۋعا ىقپال ەتەدى.
قارجى مينيسترلىگى جۇيەسىندە جاڭا كونستيتۋتسيانىڭ قۇندىلىقتارىن ءتۇسىندىرۋ جانە كەڭىنەن ناسيحاتتاۋ جۇمىستارى الداعى ۋاقىتتا دا جالعاسادى. بۇل جۇمىسقا اۋماقتىق ورگاندار مەن ۆەدومستۆوعا قاراستى ۇيىمدار دا بەلسەندى قاتىسادى.
