تۇركىستان قالاسىن دامىتۋ باعىتىنداعى جۇمىستار قاداعالاندى

تۇركىستان وبلىسىندا ينفراقۇرىلىمدى جاقسارتۋ جۇمىستارى جالعاسىپ جاتىر. ونىڭ ىشىندە تۇركىستان قالاسىن تۇركى الەمىنىڭ ورتالىعىنا اينالدىرۋ، تۋريستىك الەۋەتىن كوتەرۋ، «اقىلدى قالا» تۇجىرىمداماسىنا ساي دامىتۋ ماسەلەسى وبلىس اكىمى نۇرالحان كوشەروۆتىڭ باقىلاۋىنا الىنعان.

وبلىس اكىمى اپپاراتىنىڭ باسشىسى ەركەبۇلان داۋىلباەۆ تۇركىستان قالاسىندا جۇزەگە اسىپ جاتقان جوبالارمەن تانىسىپ، قۇرىلىس جۇمىستارىن باقىلادى. اپپارات باسشىسىنا «اقىلدى ايالداما» مەن «كوشەلەردى اقىلدى جارىقتاندىرۋ» جوبالارى تانىستىرىلدى. بۇل ايالدامانىڭ ەرەكشەلىگى – جولاۋشىلارعا قولايلى جاعداي جاسالادى، ياعني، اۋا رايىنىڭ سۋىق كۇندەرى اپتاپ ىستىعىنان قورعاماق. سونىمەن بىرگە قوعامدىق كولىكتەردىڭ كەلۋ ۋاقىتى دا كورسەتىلىپ تۇرادى. بۇل باعىتتا جاۋاپتى مەكەمە مەن ينۆەستور اراسىندا كەلىسسوز جۇرگىزىلەدى. ال جارىقتاندىرۋ جۇيەسى بويىنشا ۇسىنىستار زەردەلەنە تۇسپەك.

ەركەبۇلان داۋىلباەۆ تۇركىستاندا سالىنىپ جاتقان 5 مىڭ ادامدىق مەشىتتىڭ قۇرىلىس بارىسىمەن دە تانىستى. بۇگىندە نىسان قۇرىلىسى اياقتالىپ كەلەدى. جاۋاپتى مەردىگەرگە ءتيىستى تاپسىرمالار بەرىلدى.

اپپارات باسشىسى وبلىس ورتالىعى ماڭىنداعى شاعا جاساندى كولىنىڭ جاي-كۇيىمەن دە تانىستى. تۇركىستان وبلىسىندا «تۇركىستان» تۋريستىك-رەكرەاتسيالىق ورتالىعىنىڭ ينجەنەرلىك ينفراقۇرىلىمىن سالۋ» جوباسى، ياعني شاعا كولىن سالۋ قولعا الىنعان. كولدىڭ جالپى اۋدانى – 81,0 گا، سىيىمدىلىعى – 2,3 ملن. تەكشە مەتر، ارنالاردىڭ جالپى ۇزىندىعى – 6,1 شاقىرىم. شاعا كولىنىڭ نەگىزگى ماقساتى – تۇركىستان قالاسىنىڭ اكىمشىلىك-ىسكەرلىك ورتالىعىن كوكتەمگى سۋ تاسقىنىنان قورعاۋ. جوبا شەڭبەرىندە كولدى ءتيىمدى پايدالاۋ ماقساتىندا تۋريستىك ورىن – جاعاجاي رەتىندە نىسانعا ينفراقۇرىلىم تارتۋ، اۆتوماتتاندىرىلعان سۋارۋ جۇيەسى، ۇڭعىما، كارىز قۇبىرلارى مەن قاجەتتى قىزمەت كورسەتۋ عيماراتتارىن سالۋ كوزدەلىپ، جۇمىستار اتقارىلعان. اتالعان اۋماقتاعى جوبانى تولىق جۇزەگە اسىرىپ، تۋريستىك ايماققا اينالدىرۋ ءۇشىن ينۆەستورلارمەن كەلىسسوزدەر جۇرگىزىلدى. قالعان جۇمىستار تولىق ينۆەستورلار قارجىسى ەسەبىنەن اتقارىلادى دەپ كۇتىلىپ وتىر.