الماتى قالاسىندا دەنساۋلىق ساقتاۋ سالاسىنىڭ ينفراقۇرىلىمىن دامىتۋ جۇمىستارى جالعاسىپ جاتىر. قازىرگى تاڭدا قالادا جاڭا ەمحانالاردىڭ قۇرىلىسى جۇرگىزىلىپ، قولدانىستاعى مەديتسينالىق ۇيىمداردى جاڭعىرتۋ جانە العاشقى مەديتسينالىق-سانيتاريالىق كومەك كورسەتۋ جۇيەسىن جەتىلدىرۋ باعىتىندا اۋقىمدى جوبالار ىسكە اسىرىلۋدا.
بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسى قۇرىلىس باسقارماسىنىڭ باسشىسى نۇربول نۇرساعاتوۆ مالىمدەدى.
ونىڭ ايتۋىنشا، بۇگىندە قالا اۋماعىندا 10 دەنساۋلىق ساقتاۋ نىسانى بويىنشا قۇرىلىس جۇمىستارى جۇرگىزىلۋدە. اتاپ ايتقاندا، قۇرامىس، شۇعىلا، التاي-1, اقجار شاعىن اۋداندارىندا جانە ايتەكە بي كوشەسىندە 5 جاڭا ەمحانانىڭ قۇرىلىسى جۇزەگە اسىرىلۋدا.
سونىمەن قاتار №7 قالالىق كلينيكالىق اۋرۋحانانى جاڭعىرتۋ، №1 جانە №2 پەرزەنتحانالاردى قايتا جاڭارتۋ، الاتاۋ قالالىق ەمحاناسىن دامىتۋ، سونداي-اق №2 قالالىق بالالار كلينيكالىق اۋرۋحاناسىنا قوسىمشا عيمارات سالۋ جۇمىستارى جالعاسۋدا.
قالا تۇرعىندارىنا كورسەتىلەتىن العاشقى مەديتسينالىق كومەكتىڭ ساپاسىن ارتتىرۋعا دا ەرەكشە نازار اۋدارىلۋدا. وسى باعىتتا سايالى شاعىن اۋدانىندا جانە ايباسوۆ كوشەسىندە اۋىسىمىنا 200 ادامدى قابىلدايتىن وتباسىلىق دارىگەرلىك امبۋلاتوريالاردىڭ قۇرىلىسى جۇرگىزىلىپ جاتىر.
بۇدان بولەك، №16 قالالىق ەمحانادا كۇردەلى جوندەۋ، قالپىنا كەلتىرۋ جانە سەيسميكالىق كۇشەيتۋ جۇمىستارى قولعا الىندى.
جاڭا مەديتسينالىق نىسانداردىڭ قۇرىلىسى مەن قولدانىستاعى ۇيىمداردى جاڭعىرتۋ تۇرعىندارعا مەديتسينالىق قىزمەتتەردىڭ قولجەتىمدىلىگىن ارتتىرىپ، قالانىڭ دەنساۋلىق ساقتاۋ جۇيەسىن زاماناۋي تالاپتارعا ساي دامىتۋعا مۇمكىندىك بەرەدى.
