ءاربىر نىساننىڭ قۇرىلىسى قاتاڭ باقىلاۋدا تۇر.
وبلىس اكىمى نۇرالحان كوشەروۆتىڭ توراعالىعىمەن وتكەن كەڭەس وتىرىسىندا قۇرىلىس سالاسىنداعى جوسپارلانعان جوبالار پىسىقتالىپ، ولاردىڭ ساۋلەتتىك كەلبەتى مەن ايماقتىڭ دامۋ ستراتەگياسىنا سايكەستىگى تالقىلاندى. جيىندا تۇرعىن ءۇي، تۋريزم، مادەنيەت باعىتىنداعى جاڭا نىسانداردىڭ جوبالارى ۇسىنىلدى.
وبلىس اكىمى نۇرالحان كوشەروۆ جاۋاپتى باسقارمالارعا ارحيتەكتۋرالىق شەشىمدەردە ءوڭىردىڭ ەرەكشەلىگى مەن ۇلتتىق ناقىشتى ساقتاي وتىرىپ، زاماناۋي تسيفرلىق مۇمكىندىكتەردى كەڭىنەن قولدانۋدى جۇكتەدى.
– وڭىردە سالىناتىن نىسانداردىڭ ەسكيزدىك جوبالارىن ازىرلەۋ بارىسىندا جاساندى ينتەللەكت مۇمكىندىكتەرىن ءتيىمدى پايدالانۋ كەرەك. سونىمەن قاتار جوبالار زاماناۋي تالاپتارعا ساي، ەستەتيكالىق جانە فۋنكتسيونالدىق تۇرعىدان ۇيلەسىمدى بولۋى ءتيىس، – دەدى نۇرالحان ورالبايۇلى.
جەكە ينۆەستورلار «جاڭا قالا» مولتەك اۋدانى اۋماعىندا تۇرعىن ءۇي كەشەندەرىن سالۋ، دەمالىس ايماعى بار قوناق ءۇي سالۋ، جاڭا مەشىت اۋماعىنا كوممەرتسيالىق نىساندار سالۋ جوبالارىن تانىستىردى. سونىمەن قاتار وبلىس ورتالىعىنان بوي كوتەرەتىن «فيلورمونيا» مەن قالالىق اكىمشىلىك عيماراتىنىڭ ساۋلەتى كورسەتىلدى. ودان بولەك، شاردارا جاعاجايىنىڭ اۋماعىن اباتتاندىرۋ جايى تالقىلانىپ، تۇلكىباستا «بالىقكول» جوباسىن ىسكە اسىرۋ بويىنشا ۇسىنىس ايتىلدى.
وبلىس اكىمى ءاربىر جوبانىڭ ساپاسىنا، قولدانىلاتىن ماتەريالدارعا، اباتتاندىرۋ جۇمىستارىنا ەرەكشە نازار اۋدارۋدى تاپسىردى. سونىمەن قاتار جەرگىلىكتى تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان جوبالاردا فۋنكتسيونالدىق پەن قولجەتىمدىلىك ماڭىزدى ەكەنىن اتاپ ءوتتى. جاۋاپتى تۇلعالارعا ۇسىنىلعان جوبالاردى ناقتىلاپ، بەكىتىلگەن مەرزىمگە سايكەس جۇزەگە اسىرۋدى تاپسىردى.
ۇقساس جاڭالىقتار
