الماتىدا ECO CLUB MEDEU جاستار ەكولوگيالىق قاۋىمداستىعىنىڭ تۇساۋكەسەرى ءوتىپ، بيزنەس وكىلدەرى قالدىقتاردى قايتا وڭدەۋگە بەلسەندى قاتىسۋعا شاقىرىلدى.
مەدەۋ اۋدانىنىڭ جاستار كوميۋنيتي ورتالىعىندا جاس ەكو-بەلسەندىلەردى، ۆولونتەرلەردى جانە ەكولوگيالىق باستامالاردىڭ اۆتورلارىن بىرىكتىرگەن ECO CLUB MEDEU ەكولوگيالىق قاۋىمداستىعىنىڭ تۇساۋكەسەرى ءوتتى. جاڭا الاڭ ەكولوگيالىق مادەنيەتتى دامىتۋعا، جاۋاپتى تۇتىنۋدى ناسيحاتتاۋعا جانە «تازا قازاقستان» رەسپۋبليكالىق باستاماسى اياسىندا بىرلەسكەن جوبالاردى جۇزەگە اسىرۋعا باعىتتالعان.
كەزدەسۋگە الماتى قالاسىنداعى جاستار ۇيىمدارىنىڭ، ۆولونتەرلىك بىرلەستىكتەردىڭ جانە ەكولوگيالىق جوبالاردىڭ 45-تەن استام وكىلى قاتىستى. باسقوسۋدا بۇگىننىڭ وزىندە قالدىقتار كولەمىن ازايتۋعا، قوقىستى بولەك جيناۋ مادەنيەتىن قالىپتاستىرۋعا جانە جاستاردى ەكولوگيالىق ماسەلەلەردى شەشۋگە تارتۋعا ىقپال ەتىپ جاتقان تاجىريبەلىك باستامالار تالقىلاندى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «تازا قازاقستان» باستاماسى ءبىر رەتتىك اكتسيا ەمەس، ءاربىر ازاماتتىڭ كۇندەلىكتى ءومىر سالتى مەن قوعامدىق مادەنيەتىنىڭ اجىراماس بولىگىنە اينالۋى ءتيىس ەكەنىن بىرنەشە رەت اتاپ وتكەن بولاتىن. مەملەكەت باسشىسى قورشاعان ورتانىڭ تازالىعى ءار ادامنىڭ جەكە جاۋاپكەرشىلىگىنەن باستالاتىنىن جانە تابيعاتقا جاناشىرلىقپەن قاراۋ ەكولوگيالىق سانالى قوعام قالىپتاستىرۋدىڭ ماڭىزدى نەگىزى ەكەنىن ەرەكشە اتاپ ءوتتى. جاڭا جاستار ەكولوگيالىق قاۋىمداستىعىنىڭ قىزمەتى ءدال وسى قۇندىلىقتارعا نەگىزدەلگەن.
تۇساۋكەسەر بارىسىندا قاتىسۋشىلار پلاستيك جانە اليۋميني قالدىقتارىن، پايدالانىلعان باتارەيالاردى جيناۋ جانە قايتا وڭدەۋ، ەكىنشى رەتتىك شيكىزاتتى قايتا پايدالانۋ، ەكولوگيالىق شەبەرلىك ساباقتارىن، قالالىق سەنبىلىكتەردى، اعارتۋشىلىق ناۋقانداردى جانە باسقا دا قوعامدىق باستامالاردى تانىستىردى.
ءىس-شارا بارىسىندا ۇزاق مەرزىمدى ەكولوگيالىق مادەنيەتتى قالىپتاستىرۋ ماسەلەسىنە ەرەكشە نازار اۋدارىلدى. قاتىسۋشىلاردىڭ پىكىرىنشە، ەكولوگيالىق جاۋاپكەرشىلىك ءبىر رەتتىك اكتسيالارمەن شەكتەلمەي، كۇندەلىكتى ءومىر سالتىنا اينالۋى ءتيىس.
كەزدەسۋدىڭ نەگىزگى تاقىرىپتارىنىڭ ءبىرى بيزنەس قۇرىلىمدارىمەن ىنتىماقتاستىقتى كەڭەيتۋ بولدى. جاس ەكو-بەلسەندىلەر پلاستيك جانە اليۋميني قاپتامادا ءونىم شىعاراتىن كومپانيالاردى ەكولوگيالىق جوبالاردى قولداۋعا، قالدىقتاردى جيناۋ مەن قايتا وڭدەۋ باعدارلامالارىنا بەلسەندى قاتىسۋعا، سونداي-اق جاۋاپتى تۇتىنۋدى ىنتالاندىراتىن باستامالاردى ەنگىزۋگە شاقىردى.
مەدەۋ اۋدانى جاستار كوميۋنيتي ورتالىعىنىڭ جەتەكشىسى رۋستام قايىريەۆ:
«ەكولوگيالىق وزگەرىستەرگە قوعامنىڭ، مەملەكەتتىڭ جانە بيزنەستىڭ كۇش-جىگەرىن بىرىكتىرمەي قول جەتكىزۋ مۇمكىن ەمەس. تەك بىرلەسكەن جوبالار عانا جاڭا ەكولوگيالىق مادەنيەتتى قالىپتاستىرىپ، قورشاعان ورتاعا جاۋاپكەرشىلىكپەن قاراۋدى ءاربىر قالا تۇرعىنىنىڭ كۇندەلىكتى ءومىرىنىڭ اجىراماس بولىگىنە اينالدىرا الادى»، – دەپ اتاپ ءوتتى.
ءىس-شارانىڭ جەكە ءبولىمى جاستاردىڭ ەكولوگيالىق باستامالارى اراسىندا تاجىريبە الماسۋعا ارنالدى. قاتىسۋشىلار ەكولوگيالىق اعارتۋدىڭ جاڭا فورماتتارىن، مەكتەپ وقۋشىلارى مەن ستۋدەنتتەردى تابيعاتتى قورعاۋ قىزمەتىنە تارتۋ جولدارىن، سونداي-اق جاقىن ارادا الماتى قالاسىندا ىسكە اسىرىلاتىن بىرلەسكەن جوبالاردى تالقىلادى.
ۇيىمداستىرۋشىلاردىڭ ايتۋىنشا، ECO CLUB MEDEU زاماناۋي ەكولوگيالىق شەشىمدەردى ۇسىنۋعا، ۆولونتەرلىك باستامالاردى دامىتۋعا جانە ەكولوگيالىق جاۋاپتى قوعام قالىپتاستىرۋعا اتسالىسۋعا نيەتتى بارلىق ازاماتتار ءۇشىن اشىق الاڭ بولادى.
وسىنداي ءىس-شارالاردى وتكىزۋ ەكولوگيالىق مادەنيەتتى نىعايتۋعا، ازاماتتىق جاۋاپكەرشىلىكتى ارتتىرۋعا جانە جايلى قالالىق ورتانى قالىپتاستىرۋعا باعىتتالعان «تازا قازاقستان» جالپىۇلتتىق باستاماسىنىڭ ماقساتتارىنا تولىق سايكەس كەلەدى.
ECO CLUB MEDEU – الماتىنى تازا، ەكولوگيالىق تۇرعىدان قاۋىپسىز ءارى ءومىر سۇرۋگە قولايلى قالاعا اينالدىرۋدى ماقسات ەتكەن جاستاردىڭ قاۋىمداستىعى. ولار ءوز يدەيالارىن ناقتى جوبالارعا اينالدىرىپ، ەكولوگيالىق قوزعالىسقا قالا تۇرعىندارىن بارىنشا كەڭىنەن تارتۋدى كوزدەيدى.
