مەملەكەت باسشىسى قاسىم-جومارت توقاەۆ قازاقستاندىقتاردى ءاز-ناۋرىز مەرەكەسىمەن قۇتتىقتاي وتىرىپ، «تازا قازاقستان» باستاماسىنا ەرەكشە ءمان بەردى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
پرەزيدەنتتىڭ ايتۋىنشا، ەكى جىل بۇرىن باستالعان «تازا قازاقستان» جالپىۇلتتىق اكتسياسى قوعامدا كەڭ قولداۋ تاپقان. اسىرەسە جاستاردىڭ بەلسەندى قاتىسۋى ونىڭ اۋقىمىن ارتتىرا تۇسكەن.
«ءاز-ناۋرىز – تازارۋ، جاڭارۋ ۋاقىتى. تازالىق – ءمان-ماعىناسى كەڭ ۇعىم. بۇل – ەڭ الدىمەن، وي تازالىعى، سانا مەن نيەت تازالىعى دەگەن ءسوز.
وسىدان ەكى جىل بۇرىن ەلىمىزدە «تازا قازاقستان» جالپىۇلتتىق اكتسياسى باستاۋ الدى. اۋقىمدى جوبا حالىقتىڭ، اسىرەسە، جاستاردىڭ جاپپاي قولداۋىنا يە بولدى. ازاماتتارىمىز تازالىقتى قۇر سوزبەن ەمەس، ناقتى ىسىمەن كورسەتۋدە. ۇقىپتىلىق، جيناقىلىق، تياناقتىلىق قاسيەتتەرى ۇلتىمىزدىڭ جاڭا ساپاسىنا اينالا باستادى.
جالپى، «تازا قازاقستان» باستاماسى – جاي عانا كەزەكتى ساياسي ناۋقان نەمەسە ۇگىت-ناسيحات ەمەس، بۇل – مەملەكەتىمىزدىڭ مىزعىماس يدەولوگياسى. سوندىقتان وسى يگى ىسپەن ءبىز جىل بويى اينالىسۋىمىز كەرەك، بۇل ۇلت بولمىسىنىڭ اجىراماس بولىگى بولۋعا ءتيىس. اسىرەسە، ۇلىستىڭ ۇلى كۇنى تازالىق فيلوسوفياسىن كەڭىنەن دارىپتەۋ ماڭىزدى.
قازىر قازاقستاندا تۇبەگەيلى وزگەرىستەر كەزەڭى باستالدى. ونى بارشاڭىز جاقسى بىلەسىزدەر. ءبارىمىز ءبىر ەل بولىپ كونستيتۋتسيالىق رەفورمانى تابىستى جۇزەگە اسىردىق. بۇل رەفورمانىڭ تاريحي ءمان-ماعىناسى ەرەكشە. ونىڭ ەل دامۋىنا تيگىزەتىن ىقپالى اسا كۇشتى بولارىنا كۇمان جوق.
جاڭا كونستيتۋتسيا، ەڭ الدىمەن، وسكەلەڭ ۇرپاقتىڭ يگىلىگى ءۇشىن قابىلداندى، بۇل جاستارعا ارنالعان قۇجات دەسەك، قاتە بولمايدى. ەلىمىزگە جانى اشيتىن، ياعني شىن مانىندە جاناشىر ۇرپاق قانا قازاقستاننىڭ كوركەيۋىنە مول ۇلەس قوسا الادى. ەلىمىزدىڭ كەلەشەگى – وتانشىل، جاسامپاز، جاۋاپكەرشىلىگى مول جاستاردىڭ قولىندا.
ءبىز ەشقانداي كەدەرگى مەن قيىندىققا قاراماي، ەلىمىزدى وركەنيەت جولىنا شىعارۋىمىز كەرەك. حالقىمىزدىڭ تاريحي تاعدىرى – ءوزىمىزدىڭ قولىمىزدا.
قازاقستاننان باسقا وتانىمىز جوق. شىندىقتى ايتساق، قازاقستاننىڭ دامۋى مەن ورلەۋى بىزدەن باسقا ەشكىمگە كەرەك جوق. سوندىقتان قازىرگى ۇرپاق وتانىمىزدىڭ باياندى بولاشاعى ءۇشىن بارلىق جاعدايدى جاساۋى كەرەك.
ءبارىمىز ءبىر ۇلت بولىپ، ءبىر ەل بولىپ وسى ۇلى تاريحي جورىقتا مىندەتتى تۇردە جەڭىسكە جەتۋىمىز قاجەت. بۇل – ءبىزدىڭ ەڭ باستى مىندەتىمىز، ميسسيامىز».
ۇلىستىڭ ۇلى كۇنى جەر انا دا، ەلىمىز دە جاڭارىپ جاتقان وسى تاريحي ساتتە ايتىلعان تىلەكتىڭ ءمان-ماعىناسى ايرىقشا دەپ ويلايمىن. سوندىقتان ەڭ باستىسى ەلىمىزگە اماندىق، جەرىمىزگە تىنىشتىق تىلەيمىن.
قاسيەتتى وتانىمىز – قازاقستان رەسپۋبليكاسى ماڭگى جاساسىن!
اتا زاڭىمىز ءوز تۇعىرىنان تۇسپەسىن!
تۋىمىز بيىكتە جەلبىرەسىن!
ۇلىس وڭ بولسىن، اق مول بولسىن!
ەلىمىزدىڭ ءتورت قۇبىلاسى تۇگەل بولسىن!», - دەدى مەملەكەت باسشىسى.
