بۇگىن ورال قالاسىندا «كىتاپپەن بىرگە جولدا» جوباسى باستاۋ الدى.
اتالعان جوبانىڭ نەگىزگى ماقساتى — قوعامدىق كولىكتەگى جولاۋشىلاردىڭ ۋاقىتىن ءتيىمدى پايدالانۋىنا جاعداي جاساپ، كىتاپ وقۋ مادەنيەتىن كۇندەلىكتى ءومىردىڭ اجىراماس بولىگىنە اينالدىرۋ، سونداي-اق قالا تۇرعىندارىنىڭ رۋحاني جانە زياتكەرلىك دامۋىنا ۇلەس قوسۋ.
پرەزيدەنت قاسىم-جومارت توقاەۆ ءوز سوزىندە كىتاپ وقۋ مادەنيەتىن قالىپتاستىرۋ ەلىمىزدىڭ رۋحاني دامۋى مەن ينتەللەكتۋالدىق الەۋەتىن ارتتىرۋداعى ماڭىزدى باسىمدىقتاردىڭ ءبىرى ەكەنىن اتاپ وتكەن. مەملەكەت باسشىسىنىڭ ايتۋىنشا، جاپپاي كىتاپ وقۋ مادەنيەتىن دامىتۋ ازاماتتاردىڭ وي-ءورىسىن كەڭەيتىپ، ءبىلىم ساپاسىن ارتتىرۋعا جانە قوعامنىڭ زياتكەرلىك الەۋەتىن نىعايتۋعا مۇمكىندىك بەرەدى. وسى تۇرعىدا «كىتاپ وقيتىن ۇلت» قالىپتاستىرۋعا باعىتتالعان مۇنداي باستامالاردىڭ ماڭىزى زور.
جوبا اياسىندا قالاىشىلىك №2 جانە №5 باعىتتاعى اۆتوبۋستار جول ۇستىندەگى شاعىن كىتاپحاناعا اينالدىرىلدى. قوعامدىق كولىك سالوندارىنا ورناتىلعان ارنايى كىتاپ سورەلەرىنەن جولاۋشىلار كوركەم، تانىمدىق جانە موتيۆاتسيالىق ادەبيەتتەردى جول بويى ەركىن وقي الادى. بۇل باستاما قالا تۇرعىندارىنىڭ بوس ۋاقىتىن پايدالى وتكىزۋىنە، كىتاپقا دەگەن قىزىعۋشىلىعىن ارتتىرۋعا جانە وقىرمان مادەنيەتىن قالىپتاستىرۋعا وڭ اسەر ەتەدى.
اتالعان جوبانى جۇزەگە اسىرۋعا قالا اكىمدىگى، مادەنيەت سالاسىنىڭ وكىلدەرى جانە قوعامدىق كولىك مەكەمەلەرى اتسالىستى. ۇيىمداستىرۋشىلاردىڭ ايتۋىنشا، جوبا الداعى ۋاقىتتا وزگە باعىتتاعى اۆتوبۋستاردى دا قامتىپ، كەڭەيتىلەتىن بولادى.
