بۇگىن تۇركىستان قالاسىنىڭ اكىمى ازىمبەك پازىلبەكۇلىنىڭ توراعالىعىمەن كەزەكتى اپپاراتتىق جيىن ءوتىپ، جول ينفراقۇرىلىمىن دامىتۋ جوسپارىنىڭ ورىندالۋ بارىسى جانە مەردىگەر ۇيىمداردىڭ جۇمىسىنا باقىلاۋ مەن قالانىڭ 6 سەكتورى بويىنشا وزەكتى ماسەلەلەر قارالدى.
قازىرگى تاڭدا قالادا 845 شاقىرىم جول مەن 875 كوشە بار. وتكەن جىلدىڭ قورىتىندىسى بويىنشا ولاردىڭ 50,3%-ى جاقسى جانە قاناعاتتانارلىق جاعدايدا.
بيىل قوسىمشا 138,5 شاقىرىم جولدى جوندەۋ جوسپارلانۋدا. بۇل جۇمىستار تولىق ىسكە اسىرىلعان جاعدايدا جاقسى جاعدايداعى جولداردىڭ ۇلەسى 66,7%-عا جەتەدى دەپ كۇتىلۋدە.
قالا اكىمى ورىندالىپ جاتقان جۇمىستاردىڭ ساپاسى مەن قارقىنىنا بايلانىستى بىرقاتار سىن-ەسكەرتپەلەر ايتتى. اتاپ ايتقاندا، جوندەۋ جۇمىستارىنىڭ باياۋ جۇرگىزىلىپ جاتقانى، ىشكى كوشەلەردىڭ نازاردان تىس قالۋى جانە جوبالىق-سمەتالىق قۇجاتتار مەن بيۋدجەتتەۋ بارىسىندا جۇيەلى كەمشىلىكتەردىڭ بار ەكەندىگى ايتىلدى.
ءماجىلىس بارىسىندا جول ينفراقۇرىلىمىنا قاتىستى تۇرعىندار تاراپىنان تۇسكەن شاعىمدارعا ەرەكشە نازار اۋدارىلدى. 2025 جىلدىڭ 27–29 مامىر ارالىعىندا وتكەن قوعامدىق قابىلداۋلار بارىسىندا 171 ماسەلە كوتەرىلىپ، سونىڭ 52-ءسى جول ماسەلەلەرىنە قاتىستى بولعان. بۇل – ءار ءۇشىنشى شاعىم جول ساپاسىنا بايلانىستى ەكەنىن بىلدىرەدى.
— «كوشەلەر جوندەلىپ جاتىر، جوبالار جاسالۋدا – بىراق تۇرعىن سۇرانىسى مەن جوسپاردىڭ اراسىندا بايلانىس جوق. قالا اۋماعىندا جاڭادان اسفالت توسەلىپ جاتقان كوشەلەرگە جول بەلگىلەرى ۋاقىتىلى ورناتىلماي وتىر. بۇل – ەڭ الدىمەن جول-كولىك وقيعالارىنا الىپ كەلەتىن تىكەلەي قاۋىپ. بۇدان بىلاي جول جوندەۋ مەن جول قاۋىپسىزدىگى شارالارى — ءبىرتۇتاس پروتسەسس رەتىندە قارالۋى ءتيىس. جول بار، بىراق بەلگى جوق دەگەن جاعدايعا مۇلدە جول بەرىلمەسىن»، — دەدى قالا اكىمى.
سونىمەن قاتار، مونيتورينگ جانە جەدەل ارەكەت ەتۋ ورتالىعىنىڭ جۇمىس ناتيجەسىندە انىقتالعان وزەكتى ماسەلەلەر تالدانىپ، قالا اۋماعىنداعى رەتسىز ساۋدا مەن جارنامالاردى رەتكە كەلتىرۋ، سالىق تولەمدەرىن ءوندىرۋ، كاسىپكەرلەرمەن جۇيەلى جۇمىس جۇرگىزۋ، سونداي-اق دەپۋتاتتىق ساۋالدارعا بەرىلەتىن جاۋاپتاردىڭ تۇرعىندارعا دا قولجەتىمدى بولۋىن قامتاماسىز ەتۋ جونىندە ناقتى تاپسىرمالار بەرىلدى.
قالا اكىمى ازىمبەك پازىلبەكۇلى بارلىق بەرىلگەن تاپسىرمالاردىڭ ورىندالۋىن جەكە باقىلاۋىنا الاتىنىن، جول-كولىك ينفراقۇرىلىمى، قوعامدىق قاۋىپسىزدىك جانە قالا تازالىعى تۇرعىنداردىڭ ءومىر ساپاسىنا تىكەلەي اسەر ەتەتىن نەگىزگى باسىم باعىتتار ەكەنىن اتاپ ءوتتى.
ۇقساس جاڭالىقتار
