2026 جىل – قازاقستاننىڭ باستاماسىمەن قابىلدانىپ، بىرىككەن ۇلتتار ۇيىمى دەڭگەيىندە حالىقارالىق ۆولونتەرلەر جىلى بولىپ جاريالانعان ەرەكشە كەزەڭ. بۇل – ەلىمىزدىڭ جاھاندىق قاۋىمداستىق الدىنداعى بەدەلىن ارتتىرىپ قانا قويماي، قازاقستاندىق جاستاردىڭ جاڭا بۋىنىنىڭ بەلسەندىلىگىن، قايىرىمدىلىق پەن ازاماتتىق جاۋاپكەرشىلىك مادەنيەتىن تانىتاتىن تاريحي مۇمكىندىك.
ۆولونتەرلىك ينفراقۇرىلىمنىڭ دامۋى، تسيفرلىق پاسپورت سىندى يننوۆاتسيالىق جۇيەلەردىڭ ەنگىزىلۋى جانە مەملەكەتتىڭ جۇيەلى قولداۋى جاستار اراسىندا جاڭا كوشباسشىلاردىڭ قالىپتاسۋىنا جول اشتى. قازاقستان ستۋدەنتتەرىنىڭ اليانسى توراعاسى، رەسپۋبليكالىق ستۋدەنتتىك ومبۋدسمەن ۇلان امانقازىۇلى وسى ۇدەرىستىڭ ءمان-ماڭىزىن ءتۇسىندىرىپ، ۆولونتەرلىك قوزعالىستىڭ ەل بولاشاعىنا اسەرىن جان-جاقتى تالداپ بەردى.
– قازاقستاننىڭ حالىقارالىق ۆولونتەرلەر جىلىن جاريالاۋ جونىندەگى باستاماسى 2026 جىلى ناقتى قانداي ناتيجەلەر ارقىلى كورىنىس تابۋى ءتيىس؟
– پرەزيدەنتىمىز قاسىم-جومارت كەمەلۇلى توقاەۆ بۇۇ-نىڭ 75-سەسسياسىندا 2026 جىلدى حالىقارالىق ۆولونتەرلەر جىلى دەپ جاريالاۋ جونىندە باستاما كوتەرگەن بولاتىن. بۇل ۇسىنىس حالىقارالىق قاۋىمداستىق تاراپىنان قولداۋ تاۋىپ، ناتيجەسىندە 2026 جىل بۇكىل الەمدە ۆولونتەرلەر جىلى رەتىندە اتالىپ وتەتىن بولدى.
اتالعان باستامانىڭ ەلىمىزدەن كوتەرىلىپ، جاھاندىق دەڭگەيدە قابىلدانۋى – قازاقستان ءۇشىن تاريحي ءارى ماڭىزدى وقيعا. حالىقارالىق ۆولونتەرلەر جىلىنىڭ سالتاناتتى اشىلۋ راسىمىنە مەملەكەت باسشىسى، پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا عالىمقىزى، سونداي-اق قوعام قايراتكەرلەرى مەن ەلىمىزدىڭ ءار وڭىرىنەن ۆولونتەرلىك سالادا بەلسەندى ەڭبەك ەتىپ جۇرگەن ۇيىم وكىلدەرى قاتىستى.
ۆولونتەرلىك قىزمەت – حالىققا، ەلگە، جەرگە جانە وتانعا دەگەن سۇيىسپەنشىلىكتى ناقتى ىسپەن كورسەتۋگە مۇمكىندىك بەرەتىن ماڭىزدى ازاماتتىق ۇستانىم. 2026 جىلعى ۆولونتەرلەر جىلىنىڭ حالىقارالىق دەڭگەيدە اتاپ ءوتىلۋى ورتالىق ازيامەن عانا شەكتەلمەي، جاھاندىق ارەنادا تاجىريبە الماسۋعا، بىرلەسكەن جوبالاردى جۇزەگە اسىرۋعا جانە اۋقىمدى باستامالاردى ىسكە اسىرۋعا جول اشادى دەپ سەنەمىز.
ۆولونتەرلىك قىزمەت بىرنەشە باعىتتى قامتيدى. بۇگىندە ولاردىڭ ىشىندە ەكولوگيالىق، مەديتسينالىق جانە الەۋمەتتىك ۆولونتەرلىك ەرەكشە وزەكتىلىككە يە. الداعى ۋاقىتتا ەلىمىزدەگى ۆولونتەرلەر قاتارى ودان ءارى ارتا تۇسەدى دەپ ويلايمىز، سەبەبى قازىردىڭ وزىندە قازاقستان بويىنشا 300 مىڭنان استام ۆولونتەر بەلسەندى قىزمەت اتقارىپ ءجۇر. جالپى، ۆولونتەرلىك – حالقىمىزعا جات ۇعىم ەمەس. ۇلكەنگە قۇرمەت، كىشىگە ىزەت كورسەتۋ، ءبىر-بىرىنە قول ۇشىن سوزۋ – حالقىمىزدىڭ بويىنا ەجەلدەن سىڭگەن اسىل قاسيەتتەر.
– ۆولونتەردىڭ تسيفرلىق پاسپورتى نە ءۇشىن قاجەت جانە ول سەنىم، اشىقتىق، قاۋىپسىزدىك پەن كومەكتىڭ نىسانالى تۇردە كورسەتىلۋى سياقتى قانداي ماسەلەلەردى شەشۋگە مۇمكىندىك بەرەدى؟
– بيىلعى جىل مەملەكەت باسشىسىنىڭ جارلىعىمەن تسيفرلاندىرۋ جانە جاساندى ينتەللەكت جىلى بولىپ جاريالاندى. وسىعان وراي ءاربىر ۆولونتەردىڭ تسيفرلىق پاسپورتىن ەنگىزۋ ءبىز ءۇشىن ۇلكەن موتيۆاتسيا ءارى ماڭىزدى جەتىستىك بولماق.
تسيفرلىق پاسپورت ارقىلى ۆولونتەردىڭ اتقارعان جۇمىستارى جۇيەلى تۇردە تىركەلىپ، ونىڭ بەلسەندىلىگى مەن ۇلەسى ايقىن كورىنەدى. بۇل ءوز كەزەگىندە جۇمىسقا ورنالاسۋ ۇدەرىسىن جەڭىلدەتىپ، جەكە كورسەتكىشتەردىڭ جوعارى بولۋىنا ىقپال ەتەدى.
قازاقستان ستۋدەنتتەرى اليانسىنىڭ توراعاسى ءارى رەسپۋبليكالىق ستۋدەنتتىك ومبۋدسمەن رەتىندە ايتا كەتسەم، ءبىلىم جانە جوعارى ءبىلىم مينيسترلىگىمەن بىرلەسىپ، جوعارى وقۋ ورىندارىندا ستۋدەنتتەردىڭ قوعامدىق قىزمەتى مەن جەكە جەتىستىكتەرىن باعالاۋ تاجىريبەسى كەزەڭ-كەزەڭىمەن جۇزەگە اسىرىلىپ كەلەدى. ستۋدەنتتىڭ ۆولونتەرلىك قىزمەتكە، قوعامدىق جۇمىستارعا بەلسەندى قاتىسۋى ونىڭ اكادەميالىق كورسەتكىشتەرىنە وڭ اسەر ەتىپ، GPA دەڭگەيىن ارتتىرۋعا مۇمكىندىك بەرەدى.
سونىمەن قاتار تسيفرلىق پلاتفورما ارقىلى ستۋدەنتتىڭ قانداي باستامالارعا قاتىسقانى، قانداي جوبالاردا بەلسەندى بولعانى تولىق كورىنىس تابادى. بۇل ۆولونتەردىڭ جەكە ناتيجەلەرىن ءادىل باعالاۋعا، ال بولاشاقتا تسيفرلىق پاسپورت نەگىزىندە جۇمىسقا ورنالاسۋ مۇمكىندىگىن كەڭەيتۋگە جانە مەملەكەتتىك ماراپاتتارعا ۇمىتكەر بولۋ دەڭگەيىن ارتتىرۋعا جول اشادى دەپ سەنەمىن.
– قازاقستاندا ۆولونتەرلەر قوزعالىسىنىڭ قارقىندى دامۋىنا باستى سەرپىن بەرگەن فاكتور قانداي: مەملەكەتتىك قولداۋ، ينفراقۇرىلىمنىڭ قالىپتاسۋى الدە قاتىسۋدىڭ جاڭا فورماتتارى ما؟
– ەلىمىزدە ۆولونتەرلىك قوزعالىستىڭ قارقىندى دامۋىنا بارلىق قاجەتتى العىشارتتار قالىپتاسقان. بۇل باعىتتا ينفراقۇرىلىمنىڭ جۇيەلى تۇردە دامۋى، ۆولونتەرلىك حابتاردىڭ اشىلۋى جانە ۇيلەستىرۋ تەتىكتەرىنىڭ جولعا قويىلۋى ماڭىزدى ءرول اتقارىپ وتىر.
قازىرگى تاڭدا ۆولونتەرلىكتىڭ 8 نەگىزگى باعىتى بار، ولاردىڭ قاتارىندا ەكولوگيالىق ۆولونتەرلىك ەرەكشە ورىن الادى. ماسەلەن، پلاستيك بوتەلكەلەردى سۇرىپتاۋ جانە قايتا وڭدەۋگە ۇلەس قوسۋ – ەكو-ۆولونتەرلىكتىڭ ناقتى كورىنىسى.
سونىمەن قاتار ۆولونتەرلىكتى دامىتۋعا ءارتۇرلى قوعامدىق جانە رەسپۋبليكالىق جاستار ۇيىمدارى بەلسەندى اتسالىسۋدا. ولاردىڭ قاتارىندا قازاقستان ستۋدەنتتەرىنىڭ اليانسى، قازاقستان جاستار كونگرەسى، «جاستار رۋحى»، «رەسپۋبليكا جاستارى»، «اۋىل جاستارى» سىندى ۇيىمداردى اتاۋعا بولادى. بۇدان بولەك، وڭىرلەردە جۇمىس ىستەيتىن فرونت-كەڭسەلەر مەن ەلىمىزدە وتەتىن ءىرى ءىس-شارالار مەن فورۋمداردى ۇيىمداستىرۋدا ۇيلەستىرۋشى ءرول اتقاراتىن ۇلتتىق ۆولونتەرلىك جەلى دە بۇل سالانىڭ دامۋىنا ەلەۋلى ۇلەس قوسىپ كەلەدى.
– مەملەكەت باسشىسى اتاپ وتكەن قۇندىلىقتاردىڭ (ادام، ءبىلىم، يننوۆاتسيا، ۇلتتىق بولمىس، ەكولوگيا) قايسىسى قوعامدى كوبىرەك بىرىكتىرەدى جانە ونىڭ سەبەبى نەدە؟
– حاكىم ابايدىڭ «تولىق ادام» تۇجىرىمداماسىندا ايتىلعان ىستىق قايرات، نۇرلى اقىل، جىلى جۇرەك قاعيدالارى بۇگىنگى قوعام ءۇشىن دە وزەكتىلىگىن جوعالتقان جوق. جىلى جۇرەك – قايىرىمدىلىق جاساۋ، وزگەگە قول ۇشىن بەرۋ، قوعامعا پايدا كەلتىرۋ ۇعىمىمەن استاسادى.
قازىرگى كەزەڭ – جاساندى ينتەللەكت پەن ءبىلىمنىڭ قارقىندى دامىعان ءداۋىرى. ءبىز – بىلىمگە سەنەتىن جانە ونى قوعام يگىلىگىنە باعىتتاۋعا ۇمتىلاتىن جاس ۇرپاقپىز. مەملەكەت باسشىسى دا ءبىلىمدى وزگەلەرمەن ءبولىسۋ، جاڭا يننوۆاتسيالىق تاسىلدەر ارقىلى ۆولونتەرلىكتى دامىتۋ يدەياسىن العا تارتىپ وتىر.
وسى باعىتتا ەكولوگيالىق ۆولونتەرلىككە ەرەكشە كوڭىل ءبولىنىپ، «تازا قازاقستان» جوباسى جۇزەگە اسىرىلۋدا. اتالعان باستاما اياسىندا ءبىز دە بىرقاتار ءىرى ەكولوگيالىق ءىس-شارالار ۇيىمداستىردىق، سونىڭ ىشىندە «تازالىق جارىسى» اتتى كەڭ اۋقىمدى ەكواكتسيا وتكىزىلدى.
ەگەر جىلى جۇرەكتى ۆولونتەرلىكپەن، نۇرلى اقىلدى ءبىلىم مەن عىلىمعا نەگىزدەلگەن دامۋ ۇدەرىسىمەن بايلانىستىرار بولساق، بۇل باعىتتاردا ەلىمىزدىڭ جاستارى ايتارلىقتاي جەتىستىكتەرگە جەتىپ كەلەدى. قازاقستاندىق جاستار ءبىلىم مەن عىلىم سالاسىندا ءتۇرلى رەسپۋبليكالىق جانە حالىقارالىق بايقاۋلاردا جوعارى ناتيجەلەر كورسەتۋدە. ال ىستىق قايرات – سپورتتاعى تابىستار مەن مۇمكىندىگى شەكتەۋلى جانداردىڭ تاباندىلىعى ارقىلى كورىنىس تابۋدا. وسىلايشا، ابايدىڭ «تولىق ادام» تۇجىرىمداماسى بۇگىنگى قوعامدا، اسىرەسە جاستار اراسىندا، ناقتى ىستەر مەن ناتيجەلەر ارقىلى جۇزەگە اسىپ كەلەدى.
