تۇركىستان قالاسى اكىمدىگى تاراپىنان 2025 جىلعا جوسپارلانعان جول جوندەۋ جۇمىستارى كەزەڭ-كەزەڭىمەن قارقىندى جۇزەگە اسىرىلىپ كەلەدى.
سولاردىڭ ءبىرى شاۋعار سەكتورىنا قاراستى م.ابەنوۆا كوشەسىندە جول قۇرىلىسى اياقتالۋعا جاقىن. جوبا اياسىندا ەكى جاقتاما جيەكتاس ورناتىلىپ، ەنى 10 مەتر بولاتىن جاڭا اسفالت جابىندىسى توسەلەدى. جوندەۋ جۇمىستارى قىركۇيەك ايىنىڭ سوڭىنا دەيىن اياقتالۋى جوسپارلانۋدا.
سونىمەن قاتار، وتىرار سەكتورىنداعى ياسسى – گاۋحار انا كوشەلەرى ارالىعىنداعى جولعا ورتاشا جوندەۋ جۇمىستارى جۇرگىزىلۋدە. مۇندا اسفالت توسەۋ جانە ءبىر جاقتاما اياقجول سالۋ جۇمىستارى قاراستىرىلعان. بۇل جۇمىستار دا قىركۇيەك ايىنىڭ سوڭىنا دەيىن تولىق اياقتالماق.
بۇگىندە تۇركىستان قالاسى اۋماعىندا جالپى ۇزىندىعى 845 شاقىرىمدى قۇرايتىن 875 كوشە بار. جول ساپاسىن ارتتىرۋ جانە تۇرعىندارعا قولايلى ينفراقۇرىلىم قالىپتاستىرۋ ماقساتىندا 2025 جىلى قوسىمشا 138,5 شاقىرىم جولعا ورتاشا جوندەۋ جۇمىستارى جۇرگىزىلەدى. اتالعان جۇمىستار تولىعىمەن ىسكە اسقان جاعدايدا، قالاداعى جاقسى جاعدايداعى جولداردىڭ ۇلەسى 70 پايىزعا جەتپەك.
تۇركىستان قالاسى اكىمدىگى جول جوندەۋ جۇمىستارىنىڭ ساپاسىنا تۇراقتى باقىلاۋ جۇرگىزىپ، جوبالاردىڭ ۋاقىتىلى ءارى تالاپقا ساي ورىندالۋىن قامتاماسىز ەتەتىن بولادى.
ۇقساس جاڭالىقتار
