پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين سيىر ەتىنىڭ باعاسىنا قاتىستى پىكىر ءبىلدىردى، دەپ حابارلايدى «ادىرنا» ءتىلشىسى.
بۇعان دەيىن «اتامەكەن» ۇكپ توراعا ورىنباسارى تيمۋر جاركەنوۆ قازاقستاندا ەت ەكسپورتىنا بەلگىلى ءبىر شەكتەۋلەر ەنگىزىلۋى مۇمكىن ەكەنىن ايتقان بولاتىن. الايدا مينيستر بۇل اقپاراتتى راستامادى.
«بالكىم، الەم بويىنشا ەڭ ارزان سيىر ەتى بىزدە ساتىلاتىن شىعار. شەتەلدە قازاقستاننىڭ ەتى 10-12 دوللار تۇرادى. وعان ۇلكەن سۇرانىس بار. ال بىزدە بۇنداي باعا جوق. بىردەن ايتايىن، ەت ەكسپورتىن جاپپايمىز. ەكسپورتتىق كەلىسىمشارتتار بار، ۇيىمداسقان، بورداقىلاۋ الاڭدارى بار، ادال تابىس تاۋىپ وتىرعان شارۋاشىلىقتار ەكسپورتتى جالعاستىرا بەرەدى. بىراق ءبىز ەشتەڭە ىستەمەيتىن ءتيىمسىز دەلدالدارمەن كۇرەسەتىن بولامىز»، - دەدى جۇمانعارين.
مينيستر مال شارۋاشىلىعىمەن اينالىساتىنداردىڭ جۇمىسى اۋىر ەكەنىن اتاپ ءوتتى.
«مالشى تاڭعى بەستە تۇرىپ، مالدى سۋارادى، جەم بەرەدى، ارتىنان تازالايدى. ونىڭ دەمالىسى جوق. ەت الۋ ءۇشىن كەمىندە ءۇش جىل كەرەك. سوندا ەتتىڭ باعاسى قانشا بولۋ كەرەك؟» - دەدى ول.
