ەۋروپادا قازاق مۇنايىنىڭ تاپشىلىعى تۋىنداپ، ءىرى مۇناي ترەيدەرى Gunvor Group سولتۇستىك تەڭىزدەن شيكىزات ساتىپ الۋ كولەمىن كۇرت ارتتىردى، دەپ حابارلايدى "ادىرنا" ۇلتتىق پورتالى Bloomberg اگەنتتىگىنە سىلتەپ.
اقپارات دەرەگىنشە، كومپانيا سوڭعى ەكى كۇندە سولتۇستىك تەڭىز مۇنايىنىڭ بەس پارتياسىن ساتىپ العان.
باسىلىم مالىمەتىنە سايكەس، كاسپي قۇبىر كونسورتسيۋمى (كقك) جۇيەسىندەگى ىركىلىستەرگە بايلانىستى قازاقستان مۇنايىنىڭ ەۋروپاعا ەكسپورتى شامامەن ەكى ەسە قىسقارعان. ساراپشىلار مۇناي جەتكىزۋگە ۇشقىشسىز اپپاراتتار شابۋىلى، قولايسىز اۋا رايى جانە جوسپارلى جوندەۋ جۇمىستارىنىڭ كەدەرگى كەلتىرگەنىن مالىمدەدى.
بۇعان قوسا، ليۆياداعى جۇكتەۋ ۇدەرىسىنىڭ ءۇزىلۋى مەن نورۆەگياداعى Johan Castberg كەن ورنىنداعى تەحنيكالىق قىزمەت كورسەتۋ جاعدايدى ۋشىقتىرعان.
قازىر ەۋروپادا فيزيكالىق مۇناي نارىعىندا ايقىن تەڭگەرىمسىزدىك قالىپتاستى. اۋىر، كۇكىرتتى مۇناي تۇرلەرى نارىقتا ارتىق بولسا، قازاقستاننىڭ CPC Blend ماركاسىنا جاتاتىن جەڭىل ءارى از كۇكىرتتى مۇناي تاپشىلىققا اينالعان. ال ازيادا وپەك+ ءوندىرىسىنىڭ ءوسۋى مەن ۆەنەسۋەلادان كەلەتىن ارزان مۇناي اعىنى سالدارىنان اۋىر سورتتار كوبەيگەن.
تۋىنداعان تاپشىلىق باعانىڭ وسۋىنە اكەلدى. سولتۇستىك تەڭىز مۇنايىنىڭ نەگىزگى سورتتارىنا بەرىلەتىن ۇستەمە باعا ءبىر اپتا ىشىندە باررەلىنە شامامەن 1 اقش دوللارىنا ءوستى. ادەتتە ارزان سانالاتىن Forties سورتى Brent ەتالونىنان 2 دوللارعا جۋىق پرەميامەن ساتىلىپ جاتىر. بۇل — 2024 جىلدىڭ تامىزىنان بەرگى ەڭ جوعارى كورسەتكىش.
سونىمەن قاتار، WTI مەن Brent ماركالارى اراسىنداعى باعا ايىرماشىلىعى ايتارلىقتاي ۇلعايدى. اقش مۇنايىنىڭ فيۋچەرستەرى Brent-تەن باررەلىنە 4,76 دوللار ارزان ساۋدالانۋدا. بۇل — 2025 جىلدىڭ ساۋىرىنەن بەرگى ەڭ ۇلكەن الشاقتىق.
قازاقستاندىق Brent مۇنايىنان تومەن باعالاناتىن CPC Blend قاڭتار ايىندا سوڭعى ءبىر جىلدا العاش رەت پرەميامەن ساتىلدى. ترەيدەرلەردىڭ ايتۋىنشا، ونىڭ ۇستەمە باعاسى باررەلىنە شامامەن 1,2 دوللاردى قۇراعان. بۇعان نوۆوروسسيسكىدەن جوسپارلانعان 45 تانكەرلىك جونەلتۋدىڭ كەمىندە 21-ءىنىڭ كەيىنگە قالدىرىلۋى نەمەسە تولىق توقتاتىلۋى سەبەپ بولعان.
ساراپشىلار جاعداي اۋا رايى جاقسارىپ، قارا تەڭىز تەرمينالىنداعى جونەلتۋ قالىپقا كەلگەن سوڭ تۇراقتالادى دەپ بولجاپ وتىر. الدىن الا باعالاۋعا سايكەس، اقپان ايىندا قازاقستاندىق مۇناي ەكسپورتى تاۋلىگىنە 1,5 ملن باررەلگە دەيىن ارتۋى مۇمكىن. قاڭتاردا بۇل كورسەتكىش 500 مىڭ باررەلگە دەيىن تومەندەگەن.
