وزبەكستاننىڭ ءاندىجان وبلىسى، مارحامات اۋدانىنداعى №42 مەكتەپ ديرەكتورى مۇعالىمدەردى سىنىپتاردى جوندەۋ مەن تازالاۋ جۇمىستارىنا قاتىستىرعانى ءۇشىن قىزمەتىنەن بوساتىلدى، دەپ حابارلايدى "ادىرنا" ۇلتتىق پورتالى فەرعانا سايتىنا سىلتەمە جاساپ.
2 تامىزدا الەۋمەتتىك جەلىلەردە مۇعالىمدەردىڭ مەكتەپتە جوندەۋ جانە تازالىق جۇمىستارىن جاساپ جاتقان ءساتى بەينەلەنگەن ۆيدەو تاراعان. رەسمي مالىمەت بويىنشا، بۇل كۇنى مەكتەپتە سەنبىلىك ۇيىمداستىرىلعان. مۇعالىمدەردىڭ ايتۋىنشا، ولار شاراعا ەرىكتى تۇردە قاتىسقان. الايدا ءبىلىم باسقارماسى پەداگوگتاردى ءوز مىندەتىنە كىرمەيتىن جۇمىسقا تارتۋ زاڭسىز دەپ تانىپ، ديرەكتورعا شارا قولداندى.
سونىمەن قاتار، وزبەكستاننىڭ ەڭبەك مينيسترلىگى دە بۇل جاعدايدى تەكسەرىپ، مۇعالىمدەرگە قىسىم كورسەتىلگەنىن انىقتاعان. سونىڭ ناتيجەسىندە ديرەكتورعا 100 ايلىق ەسەپتىك كورسەتكىش ( $3200-دەن استام) كولەمىندە ايىپپۇل سالىندى.
باسقارما مالىمەتىنشە، №42 مەكتەپ 1982 جىلى سالىنعان. 2005 جىلى كۇردەلى جوندەۋدەن وتكەن. سوڭعى جىلدارى مەكتەپكە بيۋدجەت ەسەبىنەن 2022 جىلى 1,2 ملرد سۋم (شامامەن $94 مىڭ) جانە 2023 جىلى 1,3 ملرد سۋم ($102 مىڭ) كولەمىندە قارجى بولىنگەن.
