وزبەكستاندا تۇڭعىش پرەزيدەنتتىڭ قىزى گۇلنارا كارىموۆانىڭ شۆەيتساريادان قايتارىلعان قاراجاتى ەسەبىنەن انا مەن نارەستە ءولىمىن ازايتۋعا باعىتتالعان باعدارلاما جۇزەگە استى، دەپ حابارلايدى "ادىرنا" ۇلتتىق پورتالى.
بۇل تۋرالى ەلدىڭ ەكونوميكا جانە قارجى مينيسترلىگىنىڭ ءباسپاسوز قىزمەتى حابارلادى.
2023 جىلدىڭ قىركۇيەگىندە باستالعان جوبا بۇۇ بالالار قورى، بۇۇ حالىق قونىستانۋى قورى جانە دۇنيەجۇزىلىك دەنساۋلىق ساقتاۋ ۇيىمىمەن بىرلەسىپ ىسكە اسىرىلعان. باعدارلاماعا جالپى 43,5 ميلليون دوللار بولىنگەن.
قاراجات شەتەلدەن قايتارىلعان جانە گۇلنارا كارىموۆامەن بايلانىستى كومپانيالاردىڭ اكتيۆتەرى شوعىرلاندىرىلعان «يشونچ» (Uzbekistan Vision 2030) قورى ارقىلى جۇمسالعان.
جوبا اياسىندا ەل بويىنشا 231 پەرزەنتحانا زاماناۋي مەديتسينالىق جابدىقتارمەن قامتاماسىز ەتىلدى. ونىڭ ىشىندە 31 ميلليون دوللار جاڭا ينكۋباتورلار، تىنىس الۋدى قولداۋ جۇيەلەرى، انەستەزيولوگيالىق قۇرىلعىلار جانە باسقا دا ومىرلىك ماڭىزدى مەديتسينالىق تەحنيكالاردى ساتىپ الۋعا باعىتتالدى.
سونىمەن قاتار 80 مىڭنان استام مەديتسينا قىزمەتكەرى بىلىكتىلىگىن ارتتىرۋ كۋرسىنان ءوتتى. وقىتۋ باعدارلاماسى پەريناتالدىق كومەكتىڭ زاماناۋي ادىستەرىن، جوعارى قاۋىپ توبىنداعى جۇكتى ايەلدەردى جۇرگىزۋ جانە زەرتحانالىق دياگنوستيكا سالالارىن قامتىدى. بۇدان بولەك، وزبەك دارىگەرلەرىنە انا مەن نارەستە دەنساۋلىعىن قورعاۋعا ارنالعان 49 كلينيكالىق حاتتامانى ازىرلەۋ مەن جاڭارتۋ بويىنشا ادىستەمەلىك قولداۋ كورسەتىلدى.
باعدارلامانىڭ تاعى ءبىر باعىتى جۇكتى ايەلدەردىڭ تۇراقتى مەديتسينالىق باقىلاۋدان ءوتۋىنىڭ ماڭىزىن تۇسىندىرۋگە ارنالعان اقپاراتتىق ناۋقان بولدى. سونىڭ ناتيجەسىندە 4 ميلليوننان استام ادام ساپالى مەديتسينالىق قىزمەتكە قول جەتكىزگەن.
رەسمي ستاتيستيكاعا سايكەس، جوبا ىسكە قوسىلعاننان كەيىن ەلدەگى انا ءولىمى 14,5 پايىزعا تومەندەگەن. سونداي-اق سالماعى تومەن بولىپ دۇنيەگە كەلگەن سابيلەردىڭ ءومىر ءسۇرۋ كورسەتكىشى شامامەن 13 پايىزعا جاقسارعان.
وزبەكستانداعى شۆەيتساريا ەلشىسى كونستانتين وبولەنسكي قايتارىلعان اكتيۆتەردىڭ اشىق ءارى ەسەپتى تۇردە پايدالانىلۋى ەۋروپا ەلى ءۇشىن باستى باسىمدىقتاردىڭ ءبىرى ەكەنىن ايتتى. ونىڭ پىكىرىنشە، «يشونچ» قورى بۇل قاراجاتتىڭ حالىقتىڭ ءومىر ساپاسىن جاقسارتۋعا ءتيىمدى جۇمسالىپ جاتقانىن كورسەتەدى.
ايتا كەتەيىك، 2022 جىلى وزبەكستان مەن شۆەيتساريا بۇۇ اياسىندا كوپجاقتى سەنىم قورىن قۇرۋ تۋرالى كەلىسىمگە كەلگەن. بۇل قورعا گۇلنارا كارىموۆا مەن ونىڭ سەرىكتەستەرىنەن تاركىلەنگەن شەتەلدىك اكتيۆتەر اۋدارىلىپ، كەيىن ولاردى كەدەيلىكتى ازايتۋ، ءبىلىم بەرۋ، گەندەرلىك تەڭدىك، دەنساۋلىق ساقتاۋ جانە تۇراقتى دامۋ ماقساتتارىنا جۇمساۋ كوزدەلگەن.
