سوربۇلاق كولىندە جوعالعان تىكۇشاق ەكيپاجىن ىزدەۋ كۇردەلى گيدروگرافيالىق جاعدايلاردا جالعاسىپ جاتىر. بۇل تۋرالى بۇگىن، 4 تامىزدا قورعانىس مينيسترلىگى ايتتى، دەپ حابارلايدى «ادىرنا» ءتىلشىسى.
11 تاۋلىكتەن بەرى جۇرگىزىلىپ جاتقان ىزدەستىرۋ-قۇتقارۋ جۇمىستارىنا جەكە قۇرامنىڭ 330-دان استام ادامى، 59 بىرلىك اۆتوموبيل تەحنيكاسى، 23 ءجۇزۋ قۇرالى، 12 ۇشقىشسىز ۇشۋ اپپاراتى، سونداي-اق ەحولوتتار، گەورادارلار، اۆياتسيا جانە كينولوگيالىق ەسەپتوپتار تارتىلعان.
قورعانىس مينيسترلىگىنىڭ ماماندارىنان بولەك، ىزدەۋگە توتەنشە جاعدايلار مينيسترلىگى، ىشكى ىستەر مينيسترلىگى جانە باسقا دا مەملەكەتتىك قۇرىلىمداردىڭ قىزمەتكەرلەرى قاتىسۋدا.
قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆتىڭ تاپسىرماسى بويىنشا ارنايى كوميسسيا قۇرىلىپ، قۇرامىنا مەملەكەتتىك اۆياتسيانىڭ ۇشۋ قاۋىپسىزدىگى دەپارتامەنتىنىڭ جوعارى بىلىكتى ماماندارى كىردى. كوميسسيانىڭ ءبىر بولىگى ىزدەستىرۋگە جۇمىلدىرىلعان، تاعى ءبىر بولىگى اۆياتسيالىق ينتسيدەنتتى تەرگەۋ ءىس-شارالارىن جۇرگىزىپ جاتىر.
كول ءتۇبىنىڭ تەرەڭ شوگۋى، سۋ استىنداعى نولدىك كورىنۋ جانە اۋا-رايىنىڭ قۇبىلمالىلىعى سياقتى قيىن جاعدايلارعا قاراماستان، ىزدەۋ جۇمىستارى تاۋلىك بويى جۇرگىزىلۋدە.
– ءوتۋى قيىن اۋداندارعا اۋەدەن شولۋلار جاسالىپ، جاعالاۋ بەلدەۋى مەن كول اكۆاتورياسى تەكسەرىلۋدە. سۋ استى جانە جەر ءۇستى ىزدەۋلەرىنە ارنايى جابدىقتاردى پايدالاناتىن عىلىمي جانە تەحنيكالىق ۇيىمدار تارتىلعان. سونىمەن بىرگە تەحنيكالىق تەرگەۋ جالعاسۋدا. كوميسسيا اۋە كەمەسىن دايىنداۋ جانە پايدالانۋ جونىندەگى قۇجاتتامانى، قۇقىق قورعاۋ ورگاندارى مەن اۆياتسيالىق قىزمەتتەردىڭ ماتەريالدارىن، تىكۇشاق باعىتىنداعى مەتەورولوگيالىق جانە ورنيتولوگيالىق جاعدايدى جانە باسقا دا فاكتورلاردى زەردەلەپ جاتىر، – دەدى اسكەري-اۋە كۇشتەرىنىڭ قولباسشىسى اۆياتسيا گەنەرال-مايورى اسقار ءىزباسوۆ.
ىزدەۋ جۇمىستارى جوعالعان تىكۇشاقتىڭ ەكيپاج مۇشەلەرىنىڭ تاعدىرى انىقتالىپ، قايعىلى جاعدايعا اكەلگەن سەبەپتەر انىقتالعانعا دەيىن جالعاسادى.
ەسكە سالايىق، EC-145 اسكەري تىكۇشاعى 25 شىلدەدە لۋگوۆويدان ۇشىپ شىعىپ، راداردان جوعالىپ كەتكەن ەدى. ونىڭ بورتىندا ەكيپاجدىڭ ءۇش مۇشەسى بولعان.
