پاۆلودار وبلىسىندا ىزدەستىرۋ-قۇتقارۋ جۇمىستارىن جۇرگىزۋ كەزىندە «قازاۆياقۇتقارۋ» اكتسيونەرلىك قوعامىنا تيەسىلى مي-8 تىكۇشاعى ءماجبۇرلى تۇردە قوندى، دەپ حابارلايدى "ادىرنا" ۇلتتىق پورتالى.
كولىك مينيسترلىگىنىڭ مالىمەتىنشە، وقيعا 24 ماۋسىم كۇنى زاريا اۋىلى ماڭىندا بولعان. تىكۇشاق بورتىندا 13 ادام، ونىڭ ىشىندە 5 ەكيپاج مۇشەسى مەن 8 جولاۋشى بولعان. الدىن الا اقپارات بويىنشا، وقيعا سالدارىنان قازا تاپقاندار جوق. زارداپ شەككەندەر تۋرالى مالىمەت ناقتىلانىپ جاتىر.
ۆەدومستۆو بۇل جاعدايدى ادام شىعىنى جوق اۆياتسيالىق وقيعا رەتىندە باعالاپ، كولىكتەگى وقيعالاردى زەرتتەۋ دەپارتامەنتىنىڭ ماماندارى وقيعانىڭ سەبەپتەرى مەن ءمان-جايىن انىقتاۋ ءۇشىن ءتيىستى تەكسەرۋ جۇمىستارىن باستاعانىن حابارلادى.
توتەنشە جاعدايلار مينيسترلىگى اقپارات تاراتتى. ونىڭ ايتۋىنشا، تىكۇشاق 1950 جىلى تۋعان ازاماتتى ىزدەستىرۋ-قۇتقارۋ وپەراتسياسىنا قاتىسقان. الدىن الا مالىمەت بويىنشا، ەر ادام بالىق اۋلاۋ كەزىندە موتوتسيكلدەن قۇلاپ، اياعىن جاراقاتتاپ العاننان كەيىن كومەككە جۇگىنگەن.
ىزدەستىرۋ جۇمىستارى ءبىر تاۋلىككە جۋىق ۋاقىت بويى قۇتقارۋشىلار، جەرۇستى قىزمەتتەرى مەن ەرىكتىلەردىڭ قاتىسۋىمەن جۇرگىزىلىپ، ناتيجەسىندە ازامات تابىلىپ، وعان قاجەتتى مەديتسينالىق كومەك كورسەتىلگەن. قازىرگى تاڭدا ونىڭ ءومىرى مەن دەنساۋلىعىنا قاۋىپ ءتونىپ تۇرعان جوق.
