قازاقستان - كەڭ-بايتاق! قانشاما كورىكتى جەرلەرىمىز بار: بۋراباي، بالقاش، باياناۋىل، قارقارالى، مارقاكول، بوزجىرا، كولساي، شارىن! ساناي بەرسەڭ سۇيسىنە تۇسەسىڭ!
سونداي ادەمى جەردى كورۋگە، كەلىپ دەمالۋعا قۇشتار ازاماتتار كوبەيدى. وتاندىق تۋريزمگە جان ءبىتىپ كەلەدى. بۇل - قۇپتارلىق جاعداي!
ايتسە دە تابيعاتتىڭ سۇلۋ جاراتىلىسىن قولدان بۇلدىرەتىندەر دە از ەمەس. وقجەتپەستەگى مىنا قوشقار تاستارعا اتتارىن شيمايلاپ كەتكەن جاندار ءوز “ەسىمدەرىن ماڭگىلىككە” قاشاپ كەتتىك دەپ ويلاي ما ەكەن!؟.
بولماسا اقتاۋداعى سولنىشكو جاعاجايىنداعى ۇيىلگەن قوقىستار مادەنيەت بەلگىسى مە؟!.
مەملەكەت باسشىسى “تازا قازاقستان” دەگەن باستاما كوتەردى! جۇرگەن جەر، وتىرعان ورىن، بولعان تۇستارىمىزدى تازا ۇستاۋعا نە كەدەرگى؟
نەگە ءبىز ءوز ولكەمىزدى قوقىس الاڭىنا اينالدىرۋعا قۇمارمىز؟
“تاربيە - تالبەسىكتەن” دەگەن بار. تازالىق تازا سانادان باستالادى! سوندىقتان، ۇلكەن دە، كىشى دە تاربيەگە اسا ءمان بەرىپ، تازالىقتى جاس ۇرپاق ساناسىنا جاستاي سىڭىرۋگە كۇش سالعان دۇرىس!
ۇقساس جاڭالىقتار
