"تازا قازاقستان" رەسپۋبليكالىق ەكولوگيالىق اكتسياسى اياسىندا وسكەمەندەگى سول جاعالاۋ ەتنوگافيالىق كەشەنىندە اۋقىمدى تازالىق جۇمىستارى جۇرگىزىلدى.
اكتسياعا قاتىسقان 300-دەن استام ادام شاعىن توپقا ءبولىنىپ، ۇلكەن اۋماقتى قوقىستان تازالادى، ەتنواۋىلداعى ۇيلەردىڭ اۋلاسىن جينادى، حايۋاناتتار باعى مەن اسكەري تەحنيكالار تۇرعان اللەيانى رەتكە كەلتىردى.
– رەسپۋبليكالىق اكتسيا اياسىندا مۋزەي-قورىقتىڭ ماماندارى تۇگەل سەنبىلىككە شىعىپ، تازالىق جۇمىستارىن اتقاردى. 300-دەن استام ادام ەتنوگافيالىق كەشەننىڭ اۋماعىن تازالاۋعا جۇمىلدى. اينالامىزدى، قورشاعان ورتانى تازا ۇستاۋ وزىمىزگە دە پايدالى ءارى جاس ۇرپاققا ۇلگى، - دەدى شىعىس قازاقستان وبلىستىق ساۋلەت-ەتنوگرافيكالىق جانە تابيعي لاندشافتىق مۋزەي-قورىعى قازاق ەتنوگرافياسىنىڭ مەڭگەرۋشىسى دانيار مەرعاليەۆ.
قىزدار ەتنواۋىلداعى ءار ۇلتتىڭ ۇيلەرىنىڭ ەسىك-تەرەزەسىن جۋىپ، ءىشىن جيناسا، ەر ازاماتتار اۋلاداعى قىستان قالعان قوقىستى شىعارىپ، ءۇيدىڭ قورشاۋىن رەتتەدى.
– قازىر ءبىز قازاقستان حالقىنىڭ تاريحي قۇندىلىعى بولىپ سانالاتىن ساۋلەت جانە تۇرمىستىق ەسكەرتكىشتەردىڭ اينالاسىن تازالاپ جاتىرمىز. سودان كەيىن ۇيلەردى رەتكە كەلتىرەمىز. تاريحقا قۇرمەت – ماڭىزدى مىندەت. بۇل سەنبىلىككە مۇراجاي قىزمەتكەرلەرى عانا ەمەس، باسقا مەكەمەلەردىڭ دە جۇمىسشىلارى بەلسەنە قاتىسىپ جاتىر، – دەيدى وبلىستىق ساۋلەت-ەتنوگرافيكالىق جانە تابيعي لاندشافتىق مۋزەي-قورىعىنىڭ ورىس ءبولىمىنىڭ مەڭگەرۋشىسى الەكساندر ياكوۆلەۆ.
اكتسيا بارىسىندا بەلسەندىلەر ەتنواۋىلداعى ۇيلەردى تازالاۋمەن قاتار كوشەتتەر، ساندىك جانە باۋ-باقشالىق وسىمدىكتەر ەگۋدى جوسپارلاپ وتىر.
– بۇل - باي ادامنىڭ ءۇيى، گ ءارپىنىڭ فورماسىندا سالىنعاندىقتان «گلاگول» دەپ اتالادى. قازىر ءۇيدىڭ ءىشى-سىرتىن تازالاپ، ىشىندگى ەكسپوناتتاردى دالاعا جايىپ، كەپتىرىپ، جازدا كەلۋشىلەردى قارسى الۋعا دايىنداپ جاتىرمىز. كوكتەمدە اۋلاعا قىرىققابات، ءسابىز، اسقاباق، كارتوپ سياقتى كوكونىستەر ەگەمىز. كۇزدە جينالعان ءونىمدى حايۋاناتتار باعىنا بەرەمىز. سونىمەن قاتار اۋلاعا گۇلدەر ەگەمىز، - دەدى گالينا ەسىمدى ەتنواۋىلداعى ۇيلەردىڭ ءبىرىنىڭ قاراۋشىسى
