الماتىدا تۇسكى ۇزىلىستە دەمالىپ وتىرعان تازالىق قىزمەتكەرلەرىن ۆيدەوعا ءتۇسىرىپ، تىنىشتىعىن بۇزعان ايەلگە قاتىستى اكىمشىلىك ءىس قوزعالدى، دەپ حابارلايدى "ادىرنا" ءتىلشىسى.
وقيعا 22 تامىزدا ساعات 13:10 شاماسىندا مايلين كوشەسىندەگى بولىنگەن جولاقتا ورنالاسقان اللەيادا بولعان. سول ۋاقىتتا تۇركسىب اۋدانىنداعى «الماتى تازالىق» مكك قىزمەتكەرلەرى تۇسكى ۇزىلىستە وتىرعان.
اكىمدىك مالىمەتىنشە، مەكەمەنىڭ وندىرىستىك پەرسونالى تاۋلىك بويى ءۇش اۋىسىممەن جۇمىس ىستەيدى. كۇندىزگى اۋىسىم قىزمەتكەرلەرىنە ساعات 12:00-دەن 14:00-گە دەيىن، ال تۇنگى اۋىسىمعا 00:00-دەن 02:00-گە دەيىن تۇسكى ءۇزىلىس بەرىلەدى. 23 تامىزدا كاسىپورىن قىزمەتكەرلەرى ارانداتۋشىلىق سيپاتتاعى ءتۇسىرىلىم جۇرگىزگەن ايەلگە قاتىستى تۇركسىب اۋداندىق پوليتسيا باسقارماسىنا ارىز جازعان. پوليتسيا ايەلدىڭ جەكە باسىن انىقتادى.
وعان قاتىستى ۇساق بۇزاقىلىق فاكتىسى بويىنشا اكىمشىلىك ءىس قوزعالدى. جينالعان ماتەريالدار الماتى قالاسىنىڭ مامانداندىرىلعان اكىمشىلىك سوتىنا جولداندى.
سونىمەن قاتار تەكسەرۋ بارىسىندا ايەلدىڭ ءيتىن تۇمىلدىرىقسىز سەرۋەندەتكەنى انىقتالعان. جانۋارلارعا جاۋاپتى قاراۋ سالاسىنداعى زاڭناما تالاپتارىن بۇزعانى ءۇشىن وعان 10 اەك، ياعني 43 250 تەڭگە كولەمىندە ايىپپۇل سالىندى.
