مەملەكەت باسشىسى قاسىم-جومارت توقاەۆ كولىك ءمينيسترى نۇرلان ساۋرانباەۆتى قابىلدادى. بۇل تۋرالى بۇگىن، 3 شىلدەدە اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
كەزدەسۋ بارىسىندا ەلىمىزدىڭ كولىك-ترانزيت الەۋەتىن ودان ءارى ارتتىرۋ شارالارى تالقىلاندى.
قاسىم-جومارت توقاەۆ قازاقستان اۋماعى ارقىلى جۇك تاسىمالىن ۇلعايتۋ ءۇشىن اۆتوموبيل جولدارى مەن اۆياحابتار جەلىسىن بەلسەندى دامىتۋ ماڭىزدى ەكەنىنە نازار اۋداردى. سونىمەن قاتار تەمىرجول سالاسىنداعى اۋقىمدى ينفراقۇرىلىمدىق جوبالاردى ۋاقتىلى جۇزەگە اسىرۋ ماسەلەسىنە ايرىقشا ءمان بەرىلدى.
كولىك-لوگيستيكا سەكتورىنىڭ ءىجو-دەگى ۇلەسىن ۇلعايتۋ ماقساتىندا مينيسترگە كەدەرگى كەلتىرەتىن فاكتورلاردى ساراپتاپ، سالانى دامىتۋ تاسىلدەرىن قايتا قاراۋ مىندەتى جۇكتەلدى.
مەملەكەت باسشىسى كولىك دالىزدەرىنىڭ وتكىزۋ مۇمكىندىگىن كەڭەيتىپ، قازاقستاننىڭ ەۋرازياداعى نەگىزگى ساۋدا-لوگيستيكا تورابى رەتىندەگى ءرولىن نىعايتۋ ءۇشىن جان-جاقتى ءارى ءتيىمدى شارالار قابىلداۋدى تاپسىردى.
ەسكە سالايىق، نۇرلان ساۋرانباەۆ كولىك ءمينيسترى قىزمەتىنە 30 ماۋسىمدا تاعايىندالعان ەدى.
