بۇگىن استانادا ديپلوماتيالىق بيزنەس كلۋب مۇشەلەرىنىڭ وتىرىسى ءوتىپ، وندا شەتەلدىك ديپلوماتتار مەن بيزنەس-قاۋىمداستىق وكىلدەرى قازاقستاننىڭ ينۆەستيتسيالىق مۇمكىندىكتەرىمەن، سونداي-اق استانادا وتەتىن 5-ءشى دۇنيەجۇزىلىك كوشپەندىلەر ويىندارىنىڭ بارىسىمەن تانىستى.
ديپلوماتيالىق بيزنەس كلۋب وتىرىسىنا قر پارلامەنتى سەناتىنىڭ توراعاسى ماۋلەن اشىمباەۆ, ديپلوماتيالىق بيزنەس كلۋبتىڭ تەڭ توراعاسى يسلامبەك سالجانوۆ, سىرتقى ىستەر ءمينيسترىنىڭ ورىنباسارى الىبەك باقاەۆ, «اتامەكەن» قر ۇكپ تورالقا توراعاسى رايىمبەك باتالوۆ, YPO Kazakhstan توراعاسى قانات كوپباەۆ, قازاقستاندا تىركەلگەن ديپلوماتيالىق وكىلدىكتەردىڭ باسشىلارى جانە قازاقستاننىڭ بيزنەس-قاۋىمداستىق جەتەكشىلەرى قاتىستى.
كلۋب مۇشەلەرى الدىندا سويلەگەن سوزىندە ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ باستاماسىمەن ەلدى جاڭعىرتۋ باعىتىندا كەشەندى رەفورما جۇزەگە اسىرىلىپ جاتقانىن اتاپ ءوتتى. بۇگىنگى كۇننىڭ باستى مىندەتتەرىنىڭ ءبىرى – ەل دامۋىنىڭ جاڭا ەكونوميكالىق مودەلىن قالىپتاستىرۋ.
«قازاقستان بۇگىندە اشىقتىق قاعيداتتارىن ۇستانادى. سونداي-اق ەكونوميكالىق، ساياسي، مادەني-گۋمانيتارلىق جانە باسقا دا سالالاردا وزگە ەلدەرمەن جان-جاقتى ىنتىماقتاستىقتى بەلسەندى دامىتىپ كەلەدى. ديپلوماتيالىق بيزنەس كلۋبى وسى باعىتتاعى مىندەتتەردى ىسكە اسىرۋعا ءوز ۇلەسىن قوسادى دەپ سەنەمىن»، – دەدى سەنات توراعاسى.
ءوز كەزەگىندە يسلامبەك سالجانوۆ 8 جىل ىشىندە كلۋبتىڭ شەتەلدىك ديپلوماتيالىق كورپۋس پەن قازاقستاننىڭ ءتۇرلى سالالارداعى ىسكەرلىك قوعامداستىعى اراسىنداعى ءوزارا ءىس-قيمىلدى دامىتۋ جانە نىعايتۋ ءۇشىن تولىققاندى بەيرەسمي الاڭعا اينالعانىن اتاپ ءوتتى.
«مەملەكەت باسشىسىنىڭ ساياسي جۇيەنى قايتا جاڭعىرتۋ جانە الەۋمەتتىك-ەكونوميكالىق جاڭعىرتۋ بويىنشا جۇرگىزگەن رەفورمالارىنىڭ ارقاسىندا قازاقستاندا بيزنەستى جۇرگىزۋ ءۇشىن تەڭ مۇمكىندىكتەر پايدا بولدى. قازاقستان ەكونوميكاسىن ناقتى مونوپولياسىزداندىرۋ ءجۇرىپ جاتىر. سىبايلاس جەمقورلىققا قارسى كۇرەستى كۇشەيتۋ، زاڭ ۇستەمدىگى مەن ءادىل سوت تورەلىگىن ورناتۋ قازاقستانعا شەتەلدىك ينۆەستورلاردى تارتۋ ءۇشىن قولايلى جاڭا مۇمكىندىكتەر تۋعىزادى»، - دەپ اتاپ ءوتتى يسلامبەك سالجانوۆ.
«اتامەكەن» قر ۇكپ تورالقا توراعاسى رايىمبەك باتالوۆ ءوز سوزىندە ديپلوماتيالىق بيزنەس كلۋب شەتەلدىك ينۆەستورلارعا قازاقستاندا سەنىمدى سەرىكتەستەر تابۋعا مۇمكىندىك بەرەتىنىن، بۇل كلۋبتىڭ نەگىزگى باعىتتارىنىڭ ءبىرى ەكەندىگىن اتاپ ءوتتى.
YPO Kazakhstan توراعاسى قانات كوپباەۆتىڭ ايتۋىنشا، YPO مۇشەلەرى دبك قۇرىلعان كۇننەن باستاپ بەلسەندى تۇردە بىرگە جۇمىس ىستەپ كەلەدى. ونىڭ ايتۋىنشا، ىنتىماقتاستىقتىڭ باسىمدىعى ەلدەر اراسىنداعى ءوزارا ءتيىمدى ۇزاق مەرزىمدى ىسكەرلىك قارىم-قاتىناستاردى قۇرۋ جانە بۇل جەردە ديپلوماتيالىق ىسكەرلىك كلۋب باستى ءرول اتقارادى.
كەزدەسۋ بارىسىندا ديپلوماتيالىق بيزنەس كلۋبتىڭ اتقارۋشى ديرەكتورى ساياجان تۇياقوۆا كلۋبتىڭ 2024 جىلعا ارنالعان الداعى ءىس-شارالارى تۋرالى ايتتى. ولاردىڭ قاتارىندا قازاقستاننىڭ وڭىرلەرىنە ديپلوماتيالىق وكىلدىكتەر باسشىلارىنىڭ ىسكەرلىك تۋرلارى، ديپلوماتتار ءۇشىن بيزنەس-قوعامداستىق جەتەكشىلەرىمەن ىسكەرلىك تاڭعى اس، سالالىق مينيسترلىكتەردىڭ باسشىلارىمەن كەزدەسۋلەر، ينۆەستيتسيالىق احۋال بويىنشا ءتۇرلى لەكتسيالار مەن سەمينارلار وتكىزۋ جانە باسقا دا ءىس-شارالار بار.
سونداي-اق، ديپلوماتيالىق ىسكەرلىك كلۋب مۇشەلەرىنە الداعى قىركۇيەكتە استانادا وتەتىن 5-ءشى دۇنيەجۇزىلىك كوشپەندىلەر ويىندارى تانىستىرىلدى. يسلامبەك سالجانوۆ ۇلتتىق سپورت تۇرلەرى قاۋىمداستىعىنىڭ پرەزيدەنتى بولا وتىرىپ، دبك-نىڭ بارلىق مۇشەلەرىن ۇلتتىق سپورت تۇرلەرى جارىستارىنا قاتىسۋعا شاقىردى.
