اقش-تا دونالد ترامپ پەن يلون ماسك مامىر ايىندا بولعان كەلىسپەۋشىلىكتەن كەيىن العاش رەت كوپشىلىك الدىندا بىرگە بوي كورسەتتى، دەپ حابارلايدى "ادىرنا" ۇلتتىق پورتالى.
ولار 21 قىركۇيەكتە اريزونا شتاتىندا وتكەن مارقۇم چارلي كيرككە ارنالعان قوشتاسۋ راسىمىنە قاتىستى.
CNN-ءنىڭ حابارلاۋىنشا، ءىس-شارا سپورت ارەناسىندا ۇيىمداستىرىلىپ، ترامپ پەن ماسك پرەزيدەنتتىك لوجادا قاتار وتىرىپ اڭگىمەلەسكەن. باق كادرلارىندا ولاردىڭ قول الىسىپ، جىلى شىراي تانىتقانى كورىندى. ماسك كەيىن الەۋمەتتىك جەلىدە ترامپپەن سويلەسىپ وتىرعان سۋرەتتى جاريالاپ، وعان «چارلي ءۇشىن» دەپ جازدى.
ءراسىم بارىسىندا قورعانىس ءمينيسترى پيت حەگسەست ءسوز سويلەپ جاتقاندا دا، ەكى جاق قىزۋ اڭگىمەگە بەرىلىپ، قول قيمىلدارىمەن پىكىر الماسقانى بايقالدى. ماسك ءجيى باس يزەپ، تىڭداپ وتىرعان. بۇل ولاردىڭ ماسك مەملەكەتتىك قىزمەتتەن كەتكەننەن كەيىنگى العاشقى رەسمي بىرلەسكەن كورىنىسى بولدى.
جۋرناليستەر سۇراعىنا ترامپ: «ماسك كەلىپ سالەمدەستى. قارىم-قاتىناسىمىز وتە جاقسى»، – دەپ جاۋاپ بەردى.
اقپارات كوزدەرىنىڭ مالىمەتىنشە، چارلي كيرك ترامپ پەن ماسك اراسىنداعى بايلانىستى قالپىنا كەلتىرۋگە ىقپال ەتكەن.
ەسكە سالا كەتەيىك، ماۋسىم ايىندا يلون ماسك شەكتەن شىعىپ كەتكەنىن ايتىپ، ترامپتان كەشىرىم سۇراعان ەدى.
