ساياساتتانۋدان عىلىم كانديداتى، رەسەي-قازاقستان ءباسپاسوز ورتالىعىنىڭ ساراپشىسى ۆيتالي ملەچين قازاقستان پرەزيدەنتى قاسىم-جومارت توقاەۆتى «الەم مويىنداعان ساياسي اۋىر سالماقتاعى ساياساتكەر» دەپ اتادى.
بۇل پىكىر رەسەيلىك ساياساتتانۋشى اندرەي ۆىپولزوۆتىڭ اۆتورلىعىمەن جاريالانعان ماقالادا كەلتىرىلگەن.
ملەچين توقاەۆتى رەاليست دەپ سيپاتتاپ، ونىڭ سوزدەرىندە پافوس جوق ەكەنىن اتاپ ءوتتى. ول قازاقستان باسشىسىنىڭ رەسەيمەن قارىم-قاتىناستى دامىتۋعا مۇددەلى ەكەنىن جانە ءوز مالىمدەمەلەرىندە كوپۆەكتورلى، پراگماتيكالىق سىرتقى ساياساتتى ۇستاناتىنىن كورسەتتى.
ساراپشى توقاەۆتىڭ گەرمانيا كانتسلەرى ولاف شولتسپەن بەرليندەگى كەزدەسۋىندە ايتقان ءسوزىن مىسالعا كەلتىردى:
«قازاقستان – “انتيرەسەي” ەمەس. ءبىز رەسەيمەن جان-جاقتى ىنتىماقتاستىقتى ۇستانامىز. ەكى ەل اراسىنداعى شەكارا – الەمدەگى ەڭ ۇزىن شەكارا».
ۆلاديمير پۋتين دە استانادا وتكەن كەزدەسۋلەردىڭ بىرىندە:
ء«بىز – وداقتاستارمىز، ستراتەگيالىق سەرىكتەسپىز. قارىم-قاتىناستا تۇبەگەيلى كەدەرگى نەمەسە قايشىلىق جوق»، – دەپ مالىمدەگەن.
«ساياسي ساراپتامالىق توپ» جەتەكشىسى كونستانتين كالاچەۆتىڭ ايتۋىنشا، قازاقستان كوپۆەكتورلى ساياسات ۇستانسا دا، بۇل وداقتاستىقتان باس تارتۋدى بىلدىرمەيدى:
«رەسەي مەن قازاقستان – تەڭ قۇقىقتى سەرىكتەستەر. ەكى ەلدىڭ ءوزارا ءىس-قيمىلى ناقتى جوبالار ارقىلى بەكىپ وتىر. توقاەۆ – سەنىمدى ارىپتەس»، – دەدى ساراپشى.
ۆىپولزوۆ ينتەرنەتتە استانانى رەسەيدەن الشاقتادى دەپ ايىپتايتىن ماتەريالداردىڭ ءجيى جاريالاناتىنىن ايتتى. الايدا مۇنداي ايىپتاۋلار شىندىققا سايكەس كەلمەيدى دەپ تۇيىندەدى.
