اقش پرەزيدەنتى دونالد ترامپ يزرايل پرەمەر-ءمينيسترى بينيامين نەتانياحۋعا قاتىستى ءىستى دەرەۋ توقتاتۋعا شاقىردى. بۇعان دەيىن ساياساتكەر جەمقورلىق ءىسى بويىنشا سوتقا شاقىرىلعان بولاتىن، دەپ حابارلايدى «ادىرنا» ءتىلشىسى.
«يزرايل تاريحىندا نەتانياحۋدان ارتىق، مىقتى ءارى قابىلەتتى كۇرەسكەن ەشكىم بولماعان. سوعان قاراماستان، مەن قازىر عانا ونىڭ ۇزاققا سوزىلعان ءىستى جالعاستىرۋ ءۇشىن سوتقا شاقىرىلعانىن ءبىلدىم. نەتانياحۋعا قارسى سوت پروتسەسى دەرەۋ توقتاتىلۋى كەرەك نەمەسە مەملەكەت ءۇشىن وتە كوپ ەڭبەك سىڭىرگەن بۇل ۇلى قاھارمانعا راقىمشىلىق جاسالۋى ءتيىس»،—دەدى پرەزيدەنت Truth Social الەۋمەتتىك جەلىسىندە.
ترامپتىڭ ايتۋىنشا، ونىڭ نەتانياحۋمەن بىرلەسكەن جۇمىسى ەڭ ۇيلەسىمدى جانە ءتيىمدى سەرىكتەستىك بولعان.
«اقش ءيزرايلدى قۇتقاردى، ەندى نەتانياحۋدى دا قۇتقارادى»، — دەپ تولىقتىردى مەملەكەت باسشىسى.
ەسكە سالايىق، 2024 جىلدىڭ قاراشا ايىندا حالىقارالىق قىلمىستىق سوت بينيامين نەتانياحۋعا قاماۋعا الۋ تۋرالى وردەر بەردى. سوت پرەمەر-ءمينيستردى «ادامزاتقا قارسى قىلمىستار جانە اسكەري قىلمىستار» جاسادى دەپ ايىپتاپ، ونىڭ اشتىقتى سوعىس جۇرگىزۋدىڭ ءادىسى رەتىندە پايدالانعانىن مالىمدەدى.
ال 2024 جىلدىڭ جەلتوقسانىندا نەتانياحۋ يزرايل تاريحىندا العاش رەت قىلمىستىق ءىس بويىنشا ايىپتالۋشى رەتىندە سوت الدىنا شىققان قىزمەتتەگى پرەمەر-مينيستر بولدى. سول كەزدە وعان گولليۆۋدتىق ماگنات ارنون ميلچەننەن قىمبات سىيلىقتار الدى دەگەن ايىپ تاعىلدى.
نەتانياحۋعا قاتىستى سوت پروتسەسى 2020 جىلدىڭ مامىرىندا باستالعان بولاتىن. الايدا ول وسى ۋاقىتقا دەيىن بىرنەشە رەت كەيىنگە شەگەرىلدى. سەبەبى پرەمەر-مينيستر گازا سەكتورىنداعى سوعىس پەن ليۆانداعى قاقتىعىستارعا بايلانىستى تىڭداۋلاردى كەيىنگە قالدىرۋدى سۇراعان. كەلەسى سوت تىڭداۋىنىڭ ناقتى ۋاقىتى بەلگىسىز. پرەمەر وزىنە تاعىلعان ايىپتاردى مويىندامايدى.
