الماتىدا “قازاق روبين گۋد” اتىمەن تانىمال بلوگەر ىلياس ساريەۆ پەن “MM Travel” تۋريستىك اگەنتتىگىنىڭ باسشىسى اقتوتى دۇيسەەۆاعا قاتىستى سوت پروتسەسى جالعاسۋدا، دەپ حابارلايدى "ادىرنا" ۇلتتىق پورتالى.
سوت وتىرىسىندا المالى اۋداندىق سوتىنىڭ سۋدياسى ەرنار قاسىمبەكوۆ سوتقا كەلمەگەن جابىرلەنۋشىلەردىڭ ايعاقتارى مەن كەلتىرىلگەن ماتەريالدىق شىعىن تۋرالى دەرەكتەردى جاريا ەتتى.
تەرگەۋ بارىسىندا بارلىعى 26 قىلمىستىق قۇقىقبۇزۋشىلىق انىقتالىپ، ولار ءبىر ءىس اياسىندا بىرىكتىرىلگەن. سوتتالۋشىلاردىڭ كەيبىرى جابىرلەنۋشىلەردىڭ شىعىنىن ءىشىنارا وتەگەن. اتاپ ايتقاندا، دۇيسەەۆانىڭ تۋىستارى ءبىر جابىرلەنۋشىنىڭ، ال ساريەۆ تاعى ەكى ادامنىڭ شىعىنىن وتەپ بەرگەن.
جالپى كەلگەن ماتەريالدىق شىعىن كولەمى 33,5 ميلليون تەڭگەدەن اسقان. ال ءار جابىرلەنۋشىگە كەلتىرىلگەن زالال سوماسى 500 مىڭنان 5 ميلليون تەڭگەگە دەيىن جەتكەن.
سوت وتىرىسىندا ساريەۆتىڭ ادۆوكاتى قورعاۋشى تۇسىرگەن بەينەماتەريالداردى زەرتتەۋ ءۇشىن سوتتالۋشىنىڭ تەلەفونىن تەكسەرۋدى سۇرادى. ونىڭ ايتۋىنشا، بۇل جازبالار ساريەۆتىڭ الەۋمەتتىك جەلىدە قايىرىمدىلىق ماقساتىندا جاريالاۋ ءۇشىن تۇسىرىلگەن.
كەلەسى سوت وتىرىسى 30 قازان كۇنى وتەدى. وندا تاراپتار سوتتالۋشىنىڭ تەلەفونىن تەكسەرىپ، كەيىن ءجارىسسوز كەزەڭىنە وتپەك.
