اقش پرەزيدەنتى دونالد ترامپ پەن قحر توراعاسى سي تسزينپين وڭتۇستىك كورەيادا وتكەن ازيا-تىنىق مۇحيتى ەكونوميكالىق ىنتىماقتاستىق سامميتىندە كەزدەستى، دەپ حابارلايدى «ادىرنا» ءتىلشىسى.
سي تسزينپينمەن بىرگە سىرتقى ىستەر ءمينيسترى ۆان ي، ونىڭ جاقىن سەرىكتەسى ءارى اكىمشىلىك باسشىسى تساي تسي، مەملەكەتتىك ەكونوميكالىق جوسپارلاۋ كوميتەتىنىڭ توراعاسى چجەن شانتسزە جانە ساۋدا ءمينيسترى ۆان ۆەنتاو كەلدى.
اقش تاراپىنان كەلىسسوزگە مەملەكەتتىك حاتشى ماركو رۋبيو، قارجى ءمينيسترى سكوتت بەسسەنت، اقش-تىڭ قىتايداعى ەلشىسى دەۆيد پەرديۋ جانە اق ءۇي اپپاراتىنىڭ باسشىسى سيۋزان ۋايلس قاتىستى.
قىتايلىق باق مالىمەتىنشە، ەكى ەل كوشباسشىلارىنىڭ كەزدەسۋى 1 ساعات 40 مينۋتقا سوزىلعان.
اقش پرەزيدەنتى كەزدەسۋدەن كەيىن بىرنەشە مالىمدەمە جاسادى.
«سي تسزينپينمەن تاماشا كەزدەسۋ تاماشا ءوتتى. ءبىز كوپتەگەن ماڭىزدى شەشىمدەر قابىلدادىق. اتاپ ايتساق، سويا بۇرشاقتارىن ساتۋ جونىندەگى كەلىسىمدەر بىردەن باستالادى. فەنتانيلگە سالىناتىن كەدەندىك باج ەكى ەسە قىسقارىپ، 10 پايىزعا دەيىن تومەندەيدى. جالپى تاريفتەر 57 پايىزدان 47 پايىزعا ازايادى. قىتاي سيرەك كەزدەسەتىن ەلەمەنتتەر ەكسپورتىن جالعاستىرادى. سونداي-اق ءبىز قىتايمەن ۋكرايناداعى ماسەلە بليىنشا ىنتىماقتاسا جۇمىس ىستەيمىز. ءساۋىر ايىندا قىتايعا رەسمي ساپارمەن بارامىن، ال سي جاقىن ارادا اقش-قا كەلەدى. تايۆان تاقىرىبى قوزعالعان جوق»،—دەدى ول.
اقش پرەزيدەنتى قحر توراعاسىمەن وتكەن كەزدەسۋدى 10 باللدىق شكالا بويىنشا 12 باللعا باعالادى.
