ورالداعى پەريناتالدىق ورتالىقتىڭ 50 جاستاعى قىزمەتكەرى ليفت شاحتاسىنا قۇلاپ قازا تاپقان وقيعاعا قاتىستى سوت ءىسى اياقتالدى، دەپ حابارلايدى "ادىرنا" ۇلتتىق پورتالى Almaty.tv تەلەارناسىنا سىلتەمە جاساپ.
سوت شەشىمىمەن پەريناتالدىق ورتالىقتىڭ ديرەكتورى جاننا ديلمانوۆا كىناسىز دەپ تانىلىپ، تولىق اقتالدى. سۋديا ونىڭ ارەكەتىندە قىلمىستىق قۇقىقبۇزۋشىلىق قۇرامى بولماعانىن مالىمدەدى.
اتالعان ءىس باستاپقىدا قىلمىستىق كودەكستىڭ «قىزمەتتىك مىندەتتەرىن تيىسىنشە ورىنداماۋ» بابىمەن قوزعالعان. تەرگەۋ بارىسىندا مەكەمە باسشىسى قايعىلى وقيعاعا جاۋاپتى تۇلعا رەتىندە قاراستىرىلعان.
الايدا سوت ديرەكتورمەن ليفتىلەردىڭ تەحنيكالىق جاعدايىنا جاۋاپ بەرۋ مىندەتى بەكىتىلمەگەنىن انىقتادى. ونىڭ قىزمەتتىك وكىلەتتىگى مەكەمەگە جالپى باسشىلىق جاساۋمەن شەكتەلگەن. ال ليفتىلەردىڭ قاۋىپسىزدىگى مەن تەحنيكالىق جارامدىلىعىنا ليتسەنزياسى بار ارنايى ۇيىم جاۋاپتى بولعان.
«سوت ديلمانوۆا جاننا احمەتوۆنانى قىلمىستىق كودەكستىڭ 254-بابى بويىنشا كىناسىز دەپ تانىپ، اقتاۋ تۋرالى ۇكىم شىعاردى. سونداي-اق وعان زاڭسىز قىلمىستىق جاۋاپكەرشىلىككە تارتىلۋىنا بايلانىستى كەلتىرىلگەن زياندى وتەۋ قۇقىعى بەرىلدى»، – دەپ ۇكىمدى ورال قالالىق سوتىنىڭ سۋدياسى ايزادا جۇماعۇلوۆا وقىدى.
ەسكە سالايىق، قايعىلى وقيعا 2021 جىلعى 31 جەلتوقساندا بولعان. 1971 جىلى تۋعان ايەل پايدالانۋ مەرزىمى ءوتىپ كەتكەن جۇك ءليفتىسىنىڭ شاحتاسىنا قۇلاپ، وقيعا ورنىندا قازا تاپقان. مارقۇمنىڭ دەنەسىن قۇتقارۋشىلار شىعارىپ العان. بۇعان دەيىن اتالعان ليفت ارقىلى بوساناتىن ايەلدەر دە تاسىمالدانعانى حابارلانعان ەدى.
