قازاق سپورتىنا لەگيونەرلەر شاقىرتقان دۇرىس پا؟ لەگيونەرلەردى الدىرتقان قانشالىقتى ءتيىمدى؟ تالقىعا تۇسكەن سۇراقتار تۋرالى پىكىرىن رەجيسسەر، قوعام بەلسەندىسى ەركىن راقىشەۆ «ادىرنا» ۇلتتىق پورتالىنىڭ تىلشىسىنە ايتىپ بەردى.
«لەگيونەر سپورتشىلاردى شاقىرعان دۇرىس نەمەسە بۇرىس ەكەنىنە توقتالساق، بىرجاقتى جاۋاپ بەرۋ قيىن. نەگە؟ سەبەبى، قازىرگىدەي ءبىزدىڭ مەملەكەتتىڭ، حالىقتىڭ اقشاسىنا شەتەلدىڭ ورتان سپورتشىلارىن شاقىرىپ، ولارعا ايىنا 30 ملننان جوعارى اقشا تولەپ جاتقانىنا مەن مۇلدە قارسىمىن. ولار ءبىر ناتيجە كورسەتسە، قازاقستاندى الەمگە تانىتىپ جاتسا باسقا اڭگىمە. ال بۇلاردىڭ بارلىعى وسىنداعى جەرگىلىكتى فۋتبولشىلاردان اسىپ جاتقانى شامالى. بىراق اقشانى ەسەلەپ الادى.
ءبارىمىز بىلەمىز ەلدە ەشقانداي تەندەر دە، باسقاسى دا جەمقورلىقسىز بولمايتىنى. سول اقشالاردىڭ جارتىسىنان جۋىعىن وسى سپورتتىڭ اينالاسىندا جۇرگەن شەنەۋنىكتەر، جەمقورلار الىپ جاتقانى بەلگىلى. بىراق مەن شەتەلدىك سپورتشىلاردىڭ، لەگيونەرلەردىڭ ءبىزدىڭ ەلگە كەلۋىنە قارسىلىعىم جوق. ەگەر ءبىر كوماندا ءوزىنىڭ اقشاسىنا شەتەلدىك سپورتشىلاردى شاقىرسا، مەن وعان قارسى ەمەسپىن. وكىنىشكە وراي، بىزدە كوماندانىڭ بارلىعى بيۋدجەتتىڭ اقشاسىنا كۇن كورەدى. سودان كەيىن بيۋدجەتتىڭ، مەملەكەتتىڭ، حالىقتىڭ اقشاسىنا شاقىرادى. بۇلاي بولماۋى كەرەك. لەگيونەرلەردى شاقىرتۋ الەمدىك ءۇردىس. الايدا شەتەلدە كوماندالار ءوز قارجىلارىنا شاقىرادى. وكىنىشكە وراي، بىزدە ونداي ءۇردىس قالىپتاسپاعان»، - دەدى رەجيسسەر.
سونداي-اق، ول سپورتشىلاردى شەتەلگە جىبەرمەي، شەتەلدەن جاتتىقتىرۋشىلار شاقىرتۋ كەرەك دەگەن ويىمەن ءبولىستى.
«ەستەرىڭىزدە بولسا، وسىدان 7-8 جىل بۇرىن شەتەلدەن كەلەتىن سپورتشىلار تۋرالى ويىمدى ايتقان ەدىم. قازاقستاندىق جاس بالالار برازيلياعا بارىپ فۋتبول ونەرىن ۇيرەنىپ كەلمەكشى بولىپ سوندا بارعان ەدى. ولاي جاساۋعا بولمايدى، ول دۇرىس ەمەس دەپ ايتقان ەدىم. ويتكەنى، شامامەن 100 بالانى برازيلياعا جىبەرگەنشە، سول اقشاعا برازيليادان 100 ترەنەر الىپ كەلۋ قاجەت. سوندا ءبىزدىڭ فۋتبول ءۇشىن ۇلكەن ناتيجە، ەففەكت بولار ەدى. ماسەلەن، 100 بالا ارقايسىسى جەكە ءوزى ۇيرەنىپ كەلەدى. ال 1 ترەنەر 1 جىلدا 100 بالانى ۇيرەتەتىن ەدى. ءبارىمىز بەلگىلى، كۋبا بوكستان الەمدەگى ەڭ ۇزدىك مەملەكەت. ال كۋبا ونى قالاي دامىتتى؟ ولار شەتەلدەن باسقا سپورتشىلار اكەلىپ، كۋبانىڭ اتىنان قاتىستىرعان جوق. سول كەزدەگى كەڭەس ۇكىمەتىنەن ترەنەرلەر الدىردى دا، سول ترەنەرلەر كۋبانىڭ وقۋشىلارىنىڭ جاتتىقتىردى. ءسويتىپ، الەمدىك دەڭگەيگە كوتەرىلدى. بىزدە شاحماتتان قىزدارىمىز نەگە مىقتى؟ سەبەبى، شاحماتتان بىزدە گرۋزيادان، ۋكراينادان ترەنەرلەر بار. سوندىقتان تەك ترەنەرلەردى شاقىرۋ كەرەك دەپ ويلايمىن»، -دەدى ەركىن راقىشەۆ.
قوعام بەلسەندىسىنىڭ ايتۋىنشا، لەگيونەرلەردى الدىرتۋ ماقتانۋ ءۇشىن ىستەلگەن ارەكەت. ولارعا كوپ اقشا بولگەنشە، بالالاردىڭ دەنساۋلىعىنا مول قارجى ءبولىنۋ قاجەت.
«وكىنىشكە وراي بىزدە «جوعارعى» دەڭگەيدەگى سپورتقا بولىنەتىن اقشا جىلىنا 50 ملرد تەڭگە. ال بۇقارالىق سپورتقا بار-جوعى 2-3 ملرد تەڭگە بولىنەدى. كەرىسىنشە بولۋ كەرەك. بىزگە مەملەكەتتىڭ شەتەلدىك سپورتشىلارعا اقشا ءبولىپ ماقتانعانى كەرەك ەمەس ونى دەشەۆىي اۆتوريتەت قىلىپ نە كەرەگى بار؟ سوندىقتان دا اقشانى بۇقارالىق سپورتقا سالۋ كەرەك. ودان كەيىن بالالاردىڭ اراسىنداعى تۋرنيرلەردى ۇيىمداستىرۋ كەرەك. بالانىڭ ءۇش اي دەمالىسى ءتۇرلى سپورتتىق جارىستارمەن ءوتۋ كەرەك»، دەپ ءسوزىن قورىتىندىلادى.
"ادىرنا" ۇلتتىق پورتالى
