بىرقاتار شەتەلدىك باق-تا استانا رەسەيمەن شەكارادا اۋماقتىق قورعانىس بريگادالارىنىڭ ءىرى توبىن ورنالاستىراتىنى، قازاقستان رەسەيمەن جانجال تۋىنداعان جاعدايدا دايىندىق شارالارىن قابىلداپ جاتقانى تۋرالى اقپارات تارادى. الايدا، ول جالعان اقپارات بولىپ شىقتى. بۇل تۋرالى Stopfake.kz سايتى جاريالادى، دەپ حابارلايدى “ادىرنا” ۇلتتىق پورتالى.
قازاقستان رەسپۋبليكاسى قورعانىس مينيسترلىگىنىڭ ءباسپاسوز قىزمەتى بۇل اقپاراتقا قاتىستى تۇسىنىكتەمە بەردى.
«بىرقاتار شەتەلدىك باق-تا «اۋماقتىق قورعانىس تۋرالى» قازاقستان رەسپۋبليكاسى زاڭىنىڭ جوباسىنا قاتىستى جاريالانىمدارعا بايلانىستى قازاقستان رەسپۋبليكاسى قورعانىس مينيسترلىگى فاكتىلەردىڭ بۇرمالانۋى مەن ءجون-جوسىقسىز تۇسىندىرۋلەردى بولدىرماۋ ءۇشىن رەسمي تۇسىنىكتەمە بەرۋدى قاجەت دەپ سانايدى.
بۇل زاڭ جوباسى تەك ەلدىڭ ىشكى قاۋىپسىزدىگىن نىعايتۋعا باعىتتالعان جانە رەسەيگە قارسى باعىتتى قامتىمايدى.
«اۋماقتىق قورعانىس تۋرالى» زاڭ جوباسى قازاقستاننىڭ ۇلتتىق قاۋىپسىزدىك جۇيەسىن جاڭعىرتۋ شەڭبەرىندە ازىرلەندى. ونىڭ ماقساتى – ىشكى تۇراقتىلىقتى قامتاماسىز ەتۋ، حالىقتى، ينفراقۇرىلىم نىساندارىن جانە اسكەري نەمەسە وزگە دە توتەنشە جاعدايلار كەزىندە اۋماقتىق تۇتاستىقتى قورعاۋ. اۋماقتىق قورعانىس بريگادالارىن ورنالاستىرۋ سىرتقى قاۋىپتەرگە جاۋاپ رەتىندە ەمەس، وڭىرلەردىڭ لوگيستيكالىق، گەوگرافيالىق جانە دەموگرافيالىق ەرەكشەلىكتەرىن ەسكەرە وتىرىپ جۇزەگە اسىرىلادى»، – دەلىنگەن قر قورعانىس مينيسترلىگىنىڭ ءباسپاسوز قىزمەتىنىڭ حابارلاماسىندا.
سونىمەن قاتار، ۆەدومستۆونىڭ حابارلاۋىنشا، شەتەل ازاماتتارى مەن ازاماتتىعى جوق ادامداردىڭ اۋماقتىق قورعانىس بولىمشەلەرىنە قاتىسۋى كوزدەلمەگەن. زاڭنىڭ قابىلدانۋى كەز كەلگەن ەلگە قارسى ەمەس جانە بەلگىلى ءبىر باعىتتاعى قاۋىپتىڭ كورىنىسى رەتىندە قابىلدانباۋى كەرەك.
«رەسەي – ۇقشۇ، تمد، شىۇ جانە ەۋرازيالىق ەكونوميكالىق وداق شەڭبەرىندە تاتۋ كورشىلىك جانە وداقتاستىق قاتىناستاردى قولدايتىن قازاقستاننىڭ ستراتەگيالىق سەرىكتەسى.
وسىلايشا، قازاقستان رەسپۋبليكاسىنىڭ «اۋماقتىق قورعانىس تۋرالى» زاڭ جوباسىنىڭ رەسەيگە قارسى باعىتتىلىعى تۋرالى مالىمدەمە شىندىققا جاناسپايدى، ءارى بولىپ جاتقان پروتسەستەردىڭ ءمانىن بۇرمالايدى.
ازاماتتار مەن باق-تان باق-تا جانە الەۋمەتتىك جەلىلەردە پايدا بولاتىن ءتۇرلى قاۋەسەتتەرگە نازار اۋدارماي، تەك رەسمي اقپارات كوزدەرىنە سەنۋىن سۇرايمىز»، – دەپ حابارلادى قر قورعانىس مينيسترلىگى.
