Qazaq sportyna legionerler şaqyrtqan dūrys pa? Legionerlerdı aldyrtqan qanşalyqty tiımdı? Talqyǧa tüsken sūraqtar turaly pıkırın rejisser, qoǧam belsendısı Erkın Raqyşev «Adyrna» ūlttyq portalynyŋ tılşısıne aityp berdı.
«Legioner sportşylardy şaqyrǧan dūrys nemese būrys ekenıne toqtalsaq, bırjaqty jauap beru qiyn. Nege? Sebebı, qazırgıdei bızdıŋ memlekettıŋ, halyqtyŋ aqşasyna şeteldıŋ ortan sportşylaryn şaqyryp, olarǧa aiyna 30 mlnnan joǧary aqşa tölep jatqanyna men mülde qarsymyn. Olar bır nätije körsetse, Qazaqstandy älemge tanytyp jatsa basqa äŋgıme. Al būlardyŋ barlyǧy osyndaǧy jergılıktı futbolşylardan asyp jatqany şamaly. Bıraq aqşany eselep alady. Bärımız bılemız elde eşqandai tender de, basqasy da jemqorlyqsyz bolmaityny. Sol aqşalardyŋ jartysynan juyǧyn osy sporttyŋ ainalasynda jürgen şeneunıkter, jemqorlar alyp jatqany belgılı. Bıraq men şeteldık sportşylardyŋ, legionerlerdıŋ bızdıŋ elge keluıne qarsylyǧym joq. Eger bır komanda özınıŋ aqşasyna şeteldık sportşylardy şaqyrsa, men oǧan qarsy emespın. Ökınışke orai, bızde komandanyŋ barlyǧy biudjettıŋ aqşasyna kün köredı. Sodan keiın biudjettıŋ, memlekettıŋ, halyqtyŋ aqşasyna şaqyrady. Būlai bolmauy kerek. Legionerlerdı şaqyrtu älemdık ürdıs. Alaida şetelde komandalar öz qarjylaryna şaqyrady. Ökınışke orai, bızde ondai ürdıs qalyptaspaǧan», - dedı rejisser.Sondai-aq, ol sportşylardy şetelge jıbermei, şetelden jattyqtyruşylar şaqyrtu kerek degen oiymen bölıstı.
«Esterıŋızde bolsa, osydan 7-8 jyl būryn şetelden keletın sportşylar turaly oiymdy aitqan edım. Qazaqstandyq jas balalar Braziliiaǧa baryp futbol önerın üirenıp kelmekşı bolyp sonda barǧan edı. Olai jasauǧa bolmaidy, ol dūrys emes dep aitqan edım. Öitkenı, şamamen 100 balany Braziliiaǧa jıbergenşe, sol aqşaǧa Braziliiadan 100 trener alyp kelu qajet. Sonda bızdıŋ futbol üşın ülken nätije, effekt bolar edı. Mäselen, 100 bala ärqaisysy jeke özı üirenıp keledı. Al 1 trener 1 jylda 100 balany üiretetın edı. Bärımız belgılı, Kuba bokstan älemdegı eŋ üzdık memleket. Al Kuba ony qalai damytty? Olar şetelden basqa sportşylar äkelıp, Kubanyŋ atynan qatystyrǧan joq. Sol kezdegı keŋes ükımetınen trenerler aldyrdy da, sol trenerler kubanyŋ oquşylarynyŋ jattyqtyrdy. Söitıp, älemdık deŋgeige köterıldı. Bızde şahmattan qyzdarymyz nege myqty? Sebebı, şahmattan bızde Gruziiadan, Ukrainadan trenerler bar. Sondyqtan tek trenerlerdı şaqyru kerek dep oilaimyn», -dedı Erkın Raqyşev.Qoǧam belsendısınıŋ aituynşa, legionerlerdı aldyrtu maqtanu üşın ıstelgen äreket. Olarǧa köp aqşa bölgenşe, balalardyŋ densaulyǧyna mol qarjy bölınu qajet.
«Ökınışke orai bızde «joǧarǧy» deŋgeidegı sportqa bölınetın aqşa jylyna 50 mlrd teŋge. Al būqaralyq sportqa bar-joǧy 2-3 mlrd teŋge bölınedı. Kerısınşe bolu kerek. Bızge memlekettıŋ şeteldık sportşylarǧa aqşa bölıp maqtanǧany kerek emes Ony deşevyi avtoritet qylyp ne keregı bar? Sondyqtan da aqşany būqaralyq sportqa salu kerek. Odan keiın balalardyŋ arasyndaǧy turnirlerdı ūiymdastyru kerek. Balanyŋ üş ai demalysy türlı sporttyq jarystarmen ötu kerek», dep sözın qorytyndylady.
"Adyrna" ūlttyq portaly
Ūqsas jaŋalyqtar
