سىر وڭىرىنە كەلگەن اۋىل شارۋاشىلىعى ءمينيسترى شارۋالارمەن كەزدەسىپ، ەگىننىڭ جايىن تالقىلادى

2403
Adyrna.kz Telegram

قىزىلوردا وڭىرىندەگى جۇمىس ساپارى اياسىندا قر اۋىل شارۋاشىلىعى ءمينيسترى ەربول قاراشوكەەۆ وبلىس اكىمى گۇلشارا ابدىقالىقوۆامەن بىرگە كوكتەمگى ەگىس ناۋقانى مەن مال شارۋاشىلىعىن دامىتۋ ماسەلەلەرىنە ارنالعان ارنايى جيىن وتكىزدى.

وتىرىسقا "بايتەرەك" ۇلتتىق باسقارۋ حولدينگى» اكتسيونەرلىك قوعامىنىڭ باسقارۋشى ديرەكتورى ايگۇل دجۋانىشباەۆا، «قازاگروقارجى» اكتسيونەرلىك قوعامىنىڭ باسقارما توراعاسى ايدار پراشەۆ، «اگرارلىق نەسيە كورپوراتسياسى» اكتسيونەرلىك قوعامىنىڭ باسقارما توراعاسىنىڭ ورىنباسارى اسىلحان دجۋۆاشەۆ جانە اۋدانداعى شارۋاشىلىق يەلەرى قاتىسىپ، كوكەيدە جۇرگەن ساۋالدارى بويىنشا ءوزارا پىكىرلەستى.

جيىندا ايماق باسشىسى بيىلعى سۋ دەڭگەيىنىڭ تاپشىلىعىنا بايلانىستى سۋدى از قاجەت ەتەتىن ءونىم تۇرىنە دەن قويۋ، ۇكىمەتپەن بەكىتىلەتىن سۋ ليميتىنە قاراي ارەكەت ەتۋ، كانالداردى تازالاۋ، ناسوس قوندىرعىلارىن ورناتۋ ماسەلەسىندە قولعا الىنعان جۇمىستاردى تىزبەلەدى.

- بيىلعى جىلى دا سۋ ماسەلەسى وتكەن جىلعىداي وزەكتى بولعالى تۇر. بۇل ۆەگەتاتسيالىق كەزەڭدە سۋ تاپشىلىعىنىڭ ورىن الۋىنا جانە جايىلىمدىقتار مەن شابىندىقتاردى سۋلاندىرۋعا اسەر ەتەدى. وسىعان بايلانىستى ۇكىمەت رەزەرۆىنەن بولىنگەن قارجىعا بارلىعى 21 كانال تازالاۋ، 52 ۇڭعىمانى جوندەۋ جانە بۇرعىلاۋ، 133 دانا ناسوس قوندىرعىسىن الۋ جوسپارىمىزدا بار.

ءبىز وسىعان دەيىن بارلىق اۋدانداعى شارۋالارمەن كەزدەسىپ، ليميت اياسىندا ەگىلەتىن ءونىم كولەمىن ناقتىلاۋ ىسىندە ورتاق شەشىمگە كەلۋ ءۇشىن باسقوسىپ، تالقىلاپ كەلەمىز. سىزدەردە كوكونىس ەگۋدىڭ شىعىمى الدەقايدا جوعارى بولعاندىقتان، شارۋاشىلىقتاردىڭ ءاربىرى ءونىم كولەمىن ساقتاۋ ىسىندە تيىمدىلىك جاعىنا ءمان بەرۋى قاجەت. «بايقوڭىر» اكك» اق بىرلەسىپ، قاجەتتى كارتوپ، ءسابىز، پياز جانە باسقا دا ونىمدەردى ەگىپ، تۇراقتاندىرۋ قورىنا ۇسىنىپ، سىرتتان ءونىم الۋعا دەگەن تاۋەلدىلىكتى ازايتۋعا جۇمىس ىستەيىك، - دەدى گ.ابدىقالىقوۆا.

وتىرىستا بىرقاتار باسقارما باسشىلارى ۆەگەتاتسيا كەزەڭىندە ىسكە اسىرىلۋعا ءتيىس جۇمىستاردىڭ جوسپارىن بايانداسا، اۋدان اكىمى رۋسلان رۇستەموۆ ەگىسكە دايىندىق بارىسى مەن كەلىنتوبە ماگيسترالدى كانالىنىڭ باس ساعاسىنا سۋ توسپاسى قۇرىلىسىن سالۋ بويىنشا ۇسىنىس ايتتى.

جيىندا بىرقاتار شارۋا قوجالىق يەلەرى سۋبسيديا الۋ، جەم-ءشوپ تاسىمالداۋ، سۋ قورىنا قاتىستى وزەكتى ساۋالدارىن قويىپ، ۇسىنىستارىن جەتكىزدى

باسقوسۋدا كوتەرىلگەن ءاربىر ۇسىنىستاردى تىڭداي كەلە اۋىل شارۋاشىلىعى ءمينيسترى ەربول قارشوكەەۆ شارۋالاردى الاڭداتقان ماسەلەلەرگە قاتىستى ناقتى جاۋاپ بەردى.

- بيىلعى جىلى پرەزيدەنت تاپسىرماسى نەگىزىندە كوكتەمگى ەگىس جۇمىستارىنا بولىنەتىن قارجى كولەمى ۇلعايدى. بىرىنشىدەن، "كەڭ دالا" باعدارلاماسى ارقىلى جىل سايىن 70 ملرد.تەڭگە قاراجات بولىنسە، بيىل سونى ەكى ەسەگە ۇلعايتۋعا مۇمكىندىك العالى تۇرمىز. قازىر رەسپۋبليكالىق بيۋدجەتتى ناقتىلاۋ پروتسەسسىندە تۇر. ەكىنشىدەن، ازىق-تۇلىك كەلىسىم-شارت كورپوراتسياسى ارقىلى فورۆاردتىق ساتىپ الۋ ءۇشىن جىل سايىن 40 ملرد.تەڭگە ءبولىنىپ كەلدى. ونىڭ كولەمىن 80 ملرد.تەڭگەگە ۇلعايتىپ جاتىرمىز.

ال، بيىلعى كۇردەلى كەزەڭدى ەسكەرە كەلە، سۋبسيديانى الۋ ءتارتىبىنىڭ جاڭا ەرەجەسى كەلەسى جىلدىڭ 1 قاڭتارىنا قالدىرىپ، سۋبسيديا بەرۋدى ەسكى جۇيە بويىنشا ىسكە اسىرامىز. بىلتىر 2022 جىلعا رەسپۋبليكا كولەمىندە سۋبسيديالاۋعا 309 ملرد.تەنگە قارجى قاراستىرىلعان ەدى. پرەزيدەنت تاپسىرماسى اياسىندا قارجى كولەمىن 388 ملرد.تەڭگەگە ۇلعايتۋ تۋرالى ۇسىنىس بەردىك. بۇل بىلتىردان قالعان قارىزدى وتەۋگە مۇمكىندىك بەرەدى، سونداي-اق، اۋىلشارۋاشىلىق ءونىنىمىنىڭ باعاسىن تۇراقتى ۇستاۋعا سەپتىگىن تيگىزەدى. سونىمەن بىرگە، سۋبسيديالاۋدىڭ بىرىڭعاي اقپاراتىن ەنگىزەتىن جاڭا جۇيەنى دايىندادىق. بۇل بۇرىنعى قولدانىستاعى جۇيەگە قاراعاندا فەرمەرلەردەن ارتىق قۇجاتتاردى ءارى قارجىنى تالاپ ەتپەيدى. بارلىعى اۆتوماتتى تۇردە ىسكە اسىرىلادى،-دەدى ەربول قاراشوكەەۆ.

وبلىس اكىمىنىڭ ءباسپاسوز قىزمەتى

پىكىرلەر