ەگىن جيناۋ ناۋقانى باستالعاننان بەرى 12 تس/گا ورتاشا ونىمدىلىك كەزىندە 11,2 ملن توننا استىق باستىرىلدى، دەپ حابارلايدى «ادىرنا» ءتىلشىسى.
اۋىل شارۋاشىلىعى ۆيتسە-ءمينيسترى ءابىلحايىر تامابەكتىڭ ايتۋىنشا، جالپى استىق جيناۋدىڭ بولجامدى كولەمى 18,3 ملن توننا، ونىڭ ىشىندە بيداي 13,4 ملن توننادان اسادى دەپ كۇتىلۋدە.
بۇگىندە ەلىمىزدە 3,1 ملن توننا كولەمىندە اۋىسپالى استىق قالدىعى بار، ونىڭ ىشىندە 2,5 ملن تونناسى بيداي. ۆيتسە-مينيستر بۇل قور رەسپۋبليكانىڭ ىشكى قاجەتتىلىگىن تولىق قامتاماسىز ەتۋ ءۇشىن، سونداي-اق بولىگىن ەكسپورتقا وتكىزۋ جانە تيىسىنشە ءبىزدىڭ ءداستۇرلى نارىقتارىمىزداعى ساۋدا پوزيتسيالارىن ساقتاۋ ءۇشىن جەتكىلىكتى ەكەنىن العا تارتۋدا.
«جاپپاي ەگىن جيناۋ جۇمىستارى باستالعان كەزدە تراكتورلار مەن كومبايندار پاركىن جاڭارتۋ ءۇشىن اۋىل شارۋاشىلىعى تەحنيكاسىنىڭ جەڭىلدىكتى ليزينگى باعدارلاماسى ىسكە قوسىلدى، وعان 40 ملرد تەڭگە باعىتتالدى. 2022 جىلدىڭ 5 تامىزىنان باستاپ «قازاگروقارجى» اق 1130 بىرلىك تەحنيكا ساتىپ الۋعا 44,7 ملرد تەڭگە سوماسىنا 874 ءوتىنىم قابىلدادى. 18,4 ملرد تەڭگە سوماعا 345 ءوتىنىم بويىنشا قارجىلىق ليزينگ شارتتارى جاسالدى. 11,9 ملرد تەڭگە سوماعا 160 ءوتىنىم ماقۇلداندى»،-دەپ اتاپ ءوتتى ۆيتسە-ءمينيسترى ءابىلحايىر تامابەك.
قازىر ەلدە ديزەل وتىنىنا قاتىستى ماسەلە جوق. اۋىل شارۋاشىلىعى تاۋارىن وندىرۋشىلەرگە 423,5 مىڭ توننا جەڭىلدەتىلگەن سولياركا بولىنگەن. ديحاندار ءۇشىن رەسپۋبليكا بويىنشا ورتاشا باعا ليتىرىنە 203 تەڭگەدەن بولدى، بۇل نارىقتىق قۇننان 15-20% ارزان.
ايتا كەتەيىك، ەگىن جيناۋ ناۋقانى مينيسترلىكتىڭ تىكەلەي باقىلاۋىندا تۇر. اتالعان باعىتتاعى ماسەلە بويىنشا رەسپۋبليكالىق جەدەل شتاب جۇمىس ىستەيدى. ورگان تۇيىتكىلدى ىستەردىڭ كۇرمەۋىن شەشىمەن اينالىسادى.
