تاسقىن سۋدان زارداپ شەككەن ايماقتارداعى ديقاندار ەگىس ناۋقانىن ۋاقىتىندا باستاي الماۋى مۇمكىن. بۇل تۋرالى سەناتتىڭ جالپى وتىرىسىندا دەپۋتات ارمان وتەعۇلوۆ ايتتى، دەپ حابارلايدى “ادىرنا” ۇلتتىق پورتالى.
دەپۋتات قازىرگى جاعداي جەدەل ارەكەت ەتۋدى قاجەت ەتەتىنىن اتاپ ءوتتى. ويتكەنى كوكتەمنىڭ ءار كۇنى جىلعا ازىق. بۇكىل ەلىمىزدى ازىق-تۇلىكپەن قامتاماسىز ەتۋدە ءار كۇن ماڭىزدى.
«سۋ باسقان جەرلەر استىق ەگەتىن وڭىرلەرگە تيەسىلى بولعاندىقتان، كوكتەمگى ەگىس ناۋقانىن دۇرىس وتكىزۋگە قاتىستى سۇراقتار تۋىنداپ وتىر. قازىردىڭ وزىندە ەگىن سالۋ مەرزىمىنىڭ ۇزارىپ كەتۋ قاۋپى بار. ال، باۋ-باقشا، كوكونىس وسىرۋشىلەردىڭ، ساياجاي سەرىكتەستىكتەرىنىڭ جاعدايى وتە ناشار. ولاردىڭ تەحنيكالارى، سۋارۋ جۇيەلەرى مەن ترانسفورماتورلارى زاقىمدالدى، جىلىجايلار بۇزىلدى، القاپتارى سۋ استىندا قالعانىن كورىپ وتىرمىز. جەدەل دەرەكتەر بويىنشا اقتوبە، قوستاناي مەن سولتۇستىك قازاقستان وبلىستارىندا 200 تونناعا جۋىق تۇقىم قويمالارىن سۋ باسقان. وكىنىشكە قاراي، اۋىل شارۋاشىلىعى مينيسترلىگى قازىرگە دەيىن ەلىمىزدەگى سۋ استىندا قالعان ەگىستىك تۋرالى ناقتى مالىمەت بەرگەن جوق»، - دەدى ارمان وتەعۇلوۆ ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.
سەناتور مال شارۋاشىلىعىنىڭ شىعىنى مەن اسا قاۋىپتى ينفەكتسيالاردىڭ پايدا بولۋ قاۋپىنە، سۋ تاپشىلىعىنىڭ الدىن الۋعا قاتىستى ماسەلەلەردى كوتەردى. ارمان وتەعۇلوۆ وسىعان بايلانىستى ەلىمىزدىڭ پرەمەر-مينيسترىنەن بۇل ماسەلەلەر بويىنشا اقپارات بەرۋدى سۇرادى.
«قازىر سۋ باسقان وڭىرلەردەگى زارداپ شەككەن ەگىستىكتىڭ كولەمى قانداي؟ قانشا ەگىستىك تاسقىننىڭ سالدارىنان اينالىمنان شىقتى؟ فەرمەرلەر بيىل ەگىن ەگۋگە ۇلگەرە الا ما؟ ەگىس ەگىپ ۇلگەرمەگەن شارۋالارعا الاتىن پايداسى قالاي وتەلەتىن بولادى؟ شىعىن بولعان مال باسىن تولتىرۋدىڭ تەتىگى بار ما؟ قانشا اۋىل شارۋاشىلىعى تەحنيكاسى سۋعا كەتىپ، ىستەن شىقتى، ولاردى قالپىنا كەلتىرۋ جۇمىستارى قالاي جۇرگىزىلەدى؟»،- دەپ سۇرادى سەناتور وتەعۇلوۆ.
