قاسىم-جومارت توقاەۆ جىل سايىنعى قازاقستان حالقىنا جولداۋىندا اۋعانستانداعى جاعدايعا جانە جاھاندىق شيەلەنىستىڭ ورشۋىنە بايلانىستى "قورعانىس ونەركاسىبى كەشەنى مەن اسكەري دوكترينانى قايتا جۇكتەۋ" مىندەتىن قويدى، دەپ حابارلايدى "ادىرنا" ۇلتتىق پورتالى.
- قورعانىس قابىلەتىن نىعايتۋ، قاۋىپ-قاتەرلەرگە دەن قويۋدىڭ جەدەلدىگىن ارتتىرۋ - مەملەكەتتىك ماڭىزى بار باسىمدىقتارعا اينالۋى ءتيىس، - دەپ مالىمدەدى قاسىم-جومارت توقاەۆ.
مەملەكەت باسشىسى حالىقتى "سىرتقى كۇيزەلىستەرگە جانە وقيعالاردىڭ ەڭ ناشار ستسەناريىنە دايىن بولۋعا" شاقىردى. ول سونداي-اق سىرتتان كەلەتىن تاۋەكەلدەردى مودەلدەۋدى قاجەت دەپ سانايدى. پرەزيدەنت سترەسس-تەستتەر وتكىزۋدى، ستسەناريلەردى پىسىقتاۋدى، سونىڭ نەگىزىندە مەملەكەتتىك اپپاراتتىڭ جوسپارلارى مەن ارەكەتتەرىن ازىرلەپ، تۇزەتۋدى ۇسىندى.
ەستەرىڭىزگە سالا كەتەيىك، 15 تامىزدا تاليبان قوزعالىسى (قازاقستاندا تىيىم سالىنعان قوزعالىس) اۋعانستانعا باقىلاۋ ورناتقان بولاتىن. پرەزيدەنت اشراف عاني مەن اۋعان وتباسىلارى ەلدەن قاشىپ كەتتى. قر سىرتقى ىستەر مينيسترلىگىنىڭ مالىمەتىنشە، بارلىق قازاقستاندىقتار ەلدەن كەتكەن. ال قازاقستان رەسپۋبليكاسىنىڭ ەلشىسى ءالىمحان ەسەنگەلديەۆ پەن شاعىن قىزمەتكەرلەرى بولسا، كابۋلدا قالدى.
"ادىرنا" ۇلتتىق پورتالى
