تۋنيستەگى سوت ەلدىڭ بۇرىنعى پرەزيدەنتى مونسەف مارزۋكيدى سىرتتاي 22 جىلعا باس بوستاندىعىنان ايىردى، دەپ حابارلايدى "ادىرنا" ۇلتتىق پورتالى Reuters-كە سىلتەمە جاساپ.
79 جاستاعى ساياساتكەر قازىرگى مەملەكەت باسشىسى كايس سايدتىڭ اشىق سىنشىسى بولىپ ەسەپتەلەدى. ول قازىر پاريجدە قۋعىندا ءجۇر. سوت ۇكىمى بويىنشا مارزۋكي مەملەكەتتىك قاۋىپسىزدىككە قاۋىپ ءتوندىردى دەگەن ايىپپەن جازالانعان.
«بۇل سوتتىڭ ۇكىمى – زاڭسىز. ەرتەڭ بۇل ۇكىمدى شىعارعانداردىڭ وزدەرى سوت الدىندا جاۋاپ بەرەدى. تۋنيستەگى دەموكراتيا مىندەتتى تۇردە قايتا ورالادى»، – دەدى مارزۋكي سوت شەشىمىنە قاتىستى پىكىرىندە.
مارزۋكي 2011–2014 جىلدار ارالىعىندا ءتۋنيستىڭ پرەزيدەنتى قىزمەتىن اتقارعان. ول قازىرگى پرەزيدەنت سايدتى پارلامەنتتى تاراتىپ، اۆتوريتارلىق رەجيم ورناتتى دەپ ۇنەمى سىنعا الىپ كەلەدى. سايد ءوز كەزەگىندە بۇل ارەكەتتەردى ەل ىشىندەگى تۇراقتىلىقتى ساقتاۋ ماقساتىندا جاسالعان دەپ تۇسىندىرەدى.
بۇل – مارزۋكيگە شىعارىلعان ءۇشىنشى سوت ۇكىمى.
سوڭعى جىلدارى تۋنيس ەكونوميكالىق داعدارىسقا ۇشىراپ وتىر. ەلدە حالىق كوفە، ءسۇت، قانت سياقتى نەگىزگى ازىق-تۇلىككە قول جەتكىزۋدە قيىندىق كورۋدە.
2021 جىلى سايد ۇكىمەتتى تاراتىپ، پارلامەنتتىڭ جۇمىسىن توقتاتقان. كەيىن جاڭا كونستيتۋتسيا قابىلداتىپ، وكىلەتتىگىن كەڭەيتتى. الايدا، ەكونوميكالىق جاعدايدى جاقسارتا المادى.
2023 جىلى تۋنيستە بىرنەشە مارتە جاپپاي نارازىلىق اكتسيالارى ءوتىپ، حالىق سايدتىڭ وتستاۆكاسىن تالاپ ەتتى.
