سوندا اكىمدىكتە ءوز تاريحىنا قارسى ادامدار قىزمەت ەتىپ ءجۇر مە؟ - ەرلان شاياحمەتۇلى

4207
Adyrna.kz Telegram

قوعام بەلسەندىسى ەرلان شاياحمەتۇلى سەمەي قالاسى اكىمدىگىنىڭ ىسىنە، ايتقان مالىمدەمەسىنە كوڭىلى تولماعانىن جازدى دەپ حابارلايدى، "ادىرنا" ءتىلشىسى. بۇل تۋرالى ول ءوزىنىڭ الەۋمەتتىك جەلىسىندە جازدى. 

"سەمەي قالاسىنىڭ ىشكى ساياسات بولىمىندە ىستەيتىن ءبىر ازامات ءازىلحان نۇرشايىقوۆتىڭ اتىنا كوشە بەرۋگە قارسى شىعىپ، باتىر قىز بايان بايعوجينانى فەيك دەپ، سەمەيگە وركەنيەتپەن مادەنيەتتى ورىستار اكەلدى دەگەندەر، مىڭ جىلدىق شاھار تاريحى ورىستاردىڭ كەلۋىمەن 300 جىل بۇرىن باستالدى دەپ ايتقاندار، لەنين اتىنداعى كوشە ماڭگىلىك ەل اتانۋىنا قارسى شىققان، سەمەي ەمەس سەميپالاتينسك دەپ جۇرگەن وزگە ۇلت وكىلدەرىن زيالى قاۋىم قاتارىنا قوسىپ، ولاردىڭ پىكىرىمەن ساناسۋ كەرەك دەپتى. سوندا اكىمدىكتە ءوز تاريحىنا قارسى ادامدار قىزمەت ەتىپ ءجۇر مە؟ قالاي ءوزى؟

جاڭا عانا سەمەي قالاسىنىڭ اكىمى ب. باياحمەتوۆتىڭ تىكەلەي قابىلداۋىمەن اشتىم، تەڭەۋمەن ايتسام بۇگىن اقپاننىڭ ەسىگىن دە اشقان كۇن. قابىلداۋعا اكىم ورىنباسارى ا. سادىرباەۆ، ىشكى ساياسات بولىمىنەن ج. ۇيسىنباەۆا، مادەنيەت جانە تىلدەردى دامىتۋ ءبولىمى باسشىسى ن. اققوجينالار قاتىستى.
جالپى قابىلداۋدىڭ جاۋاپتى ورىنباساردىڭ بەرگەن دالەلدەرىنە مۇلدە كوڭىلىم تولمادى. اكىمنىڭ ورىنباسارى مەن ىشكى ساياسات ءبولىمى باسشىسى مۇلدە تىعىرىققا تىرەلىپ جاۋاپ بەرە المادى. 2013 ءتى بىلاي قويعاندا 2016 جىلى وتكەن بايقاۋدان مۇلدە تۇك بىلمەي حابارسىز شاراسىزدىق تانىتۋلارى كوڭىلىمە كۇدىك ۇيالاتتى. سوندا رەسمي قۇجاتتار راسىمدەلمەگەن بە؟ اكىم ورىنباسارى "زيالى قاۋىم قارسى" دەگەن پىكىرىن دە ايتىپ قالدى، سىلتاۋى تاۋسىلىپ ەندى زيالى قاۋىمنىڭ اتىن جامىلۋعا كوشكەن بە دەگەن وي قىلاڭ بەردى!؟ مەن دە اۋزى اڭقايىپ سەنە بەرەتىن ادام ەمەسپىن عوي. تالاي ناعىز زيالى قاۋىم وكىلدەرىمەن سۇحباتتاسىپ اق باتالارىن الىپ كەلدىم. ءوز قالاسىنا تاۋەلسىزدىكتىڭ جاڭا تاڭباسىن، تاريحىن قابىلداۋعا قارسى ول قانداي زيالى قاۋىم؟ وسىعان بايلانىستى اكىم ب. باياحمەتوۆ ماسەلەنىڭ اق-قاراسىن انىقتاۋعا ورىنباسارى مەن ىشكى ساياسات بولىمىنە ءبىر جۇما ۋاقىت بەردى.  تاعى دا سول ا. سادىرباەۆقا جۇكتەلدى، اكىمنىڭ قابىلداۋىنان سوڭ ورىنباسارىنىڭ ءوزىن اشۋلى ۇستاۋى دا كوڭىلىمە ءتۇرلى كەلەڭسىز وي سالدى. ونىڭ ۇستىنە ەندى بايقاۋدى ءۇشىنشى رەت ۇيىمداستىرۋ تۋرالى دا ۇسىنىس ايتىلىپ قالدى، مەن وعان ءۇزىلدى-كەسىلدى قارسى شىقتىم. ەندى تاعى بايقاۋ ۇيىمداستىرىلسا قاتىسۋدان باس تارتامىن، ون جىل مازاق بولۋدان قاجىدىم، جانە ونى جەكە باسىما دەگەن لاۋازىمدارىن اسىرا پايدالانىپ قورلاۋ دەپ قابىلدايمىن. قايتكەندە مەنى شەتتەتىپ-مۇقاتۋ ارەكەتى دەپ ويلايمىن. ونداي مورالدىق تۇرعىدان كەمسىتۋدى جەكە، سوت ارقىلى شەشۋ جولىن قاراستىرامىن. ون جىلدان استام ۋاقىتىمدى، دەنساۋلىعىمدى وسى قالا تاڭباسى ءۇشىن بەرگەن اداممىن. اياق استىنان پايدا بولعان قالا تاڭباسىنا الاڭداعىش "زيالىلار" سوندا قايدا بولدى؟ ونداي ار-ۇياتىن جيىپ قويعانداردى "زياندى قاۋىم" دەر ەدىم! مەن ەشكىمنىڭ مازاعى ەمەسپىن! ەندى ۇكىمەتكە دە مويىنداتىپ، بار زاڭدىلىعىن دالەلدەپ، مەملەكەتتىك كوميسسيانىڭ رۇقساتىن الىپ بەرگەندە بۇل قۇيقىلجۋلارى قاي قۇيقىلجۋ؟ جالپى ادامنىڭ ۇلىنا، ادامگەرشىلىككە جاتادى ما؟ قالاي ويلايسىزدار؟ اكىمدىك ۇكىمەت بەكىتكەن گەرالديكاعا جاۋاپتى جوعارى قۇزىرلى ورىنداردىڭ شىعارعان شەشىمىن پىسقىرماي دا وتىر ما دەپ قالدىم؟ جاۋاپتارىنا سەندىم بە، جوق! تاعى تەرەڭدەتكىلەرى كەلسە قارسىلىعىم جوق، قىرقىنا دا شىداعان جۇرەكتەن "ەندى بىرىنە دە شىدا" دەپ سۇراپ كورەمىن.
ءبىر جۇمادان سوڭ بەرىلەتىن جاۋاپ مەنى قاناعاتتاندىرماسا سەمەي قالاسىنىڭ اكىمى جانە شقو اكىمدىگىنىڭ قۇزىرلى ورىندارىنان سەمەي قالاسىنىڭ ورتالىق الاڭىنا زاڭ اياسىندا بەيبىت ميتينگ وتكىزۋگە حات تۇسىرمەكپىن. بارلىق تۋىنداعان ماسەلەنى، تۋىنداتىپ وتىرعان ادامدى سول جەردە باق ارقىلى ايتىپ بەرەمىن.
جانە بۇل تۋرالى رەسپۋبليكالىق گازەت ارقىلى دا كوتەرۋگە شەشىم قابىلداپ وتىرمىن.
مەن اكىمدىكتەن جاڭا قازاقستاننىڭ اشىق ۇكىمەتىنىڭ لاۋازىم يەسىنە دەگەن ءۇمىتىم ودان سايىن جىڭىشكەرىپ ءۇزىلۋ شەگىنە جەتكەندەي اسەردە شىقتىم. اقيقاتى وسى!
اكىمنىڭ پەندە بەرگەن لاۋازىمى ۇلكەن بولسا، مەنىڭ اللا بەرگەن جاسىم ۇلكەن عوي، قابىلداۋ سوڭىنا اكىمنىڭ ەڭبەگىنە تابىس تىلەپ: - مانساپتىڭ قۇلى ەمەس، حالقىڭىزدىڭ ۇلى بولىڭىز! دەپ اماندىق تىلەپ، امانات باتا بەرىپ قوشتاستىم.
اكىم دە ءوز تاراپىنان: - اتانىڭ ەمەس، ادامنىڭ ۇلى بولۋعا ۋادە بەردى.
بۇل سوزىمدە جالعان جوق، ايتىلماي ءسوزىم قالعان جوق..." دەپ جازدى ول جازباسىندا.
پىكىرلەر