قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ يزرايل مەن حاماس اراسىنداعى اتىستى توقتاتۋ تۋرالى كەلىسىمدەرگە قاتىستى قازاقستاننىڭ ۇستانىمىن ءبىلدىردى، دەپ حابارلايدى "ادىرنا" ۇلتتىق پورتالى.
ء"بىز يزرايل مەن حاماس اراسىنداعى اتىستى توقتاتۋ تۋرالى كەلىسىمدى قولدايمىز. كاتار، ەگيپەت جانە اقش مەملەكەتتەرىنىڭ ارا اعايىندىق تالپىنىستارىن جوعارى باعالايمىز. بۇل كۇش قولدانۋدى توقتاتىپ، كەپىلدەگىلەردى بوساتۋعا جانە گازا سەكتورىنا گۋمانيتارلىق كومەك جەتكىزۋدى كۇشەيتۋگە جاسالعان ماڭىزدى قادام. قازىرگى جاعدايدا بۇل اۋاداي قاجەت شارالار. قازاقستان ءاردايىم بەيبىتشىلىك جاعىندا. بۇل كەلىسىمدەر قاقتىعىستى ەرتە رەتتەۋگە نەگىز بولادى دەپ ۇمىتتەنەمىز", – دەدى ايبەك سمادياروۆ.
ءسىم وكىلى قازاقستاننىڭ بۇل ماسەلەدە بۇۇ شەشىمدەرىنە سۇيەنەتىنىن ەسكە سالدى.
"قازاقستان پالەستينا-يزرايل قاقتىعىسىن «ەكى حالىققا ەكى مەملەكەت» فورمۋلاسى نەگىزىندە شەشۋدى تاباندى تۇردە قولدايدى. بۇل ەكى تاۋەلسىز مەملەكەت قۇرۋدى بىلدىرەدى. پالەستيندىكتەر مەن يزرايلدىكتەر وسى مەملەكەتتەردە قاۋىپسىز ءارى بەيبىت ءومىر سۇرۋگە مۇمكىندىك الۋى ءتيىس. ءبىز حالىقارالىق قاۋىمداستىقتىڭ ۇزاق مەرزىمدى بەيبىتشىلىك ورناتىپ، ادىلدىك قالىپتاستىرۋعا باعىتتالعان تالپىنىستارىن قولداۋعا دايىنبىز", – دەدى ايبەك سمادياروۆ.
ەسكە سالا كەتەيىك، بۇگىن استانا ۋاقىتى بويىنشا شامامەن ساعات 14:00-دە يزرايل تۇتقىندار ءتىزىمىن العانىن جانە اتىستى رەسمي تۇردە توقتاتاتىنىن راستادى.
