Atyraýda ZERDELI aqyl-oı damytý mektebi men Talanttardy anyqtaý jáne qoldaý ortalyǵy 2-5 qarasha kúnderi «Altyn saqa» matematıkalyq olımpıadasynyń oblystyq kezeńine daıyndyq maqsatynda oqý-jattyǵý jıynyn ótkizdi, dep habarlaıdy "Adyrna" ulttyq portaly derekkózge siltep.
«Ustaz» mektebinde ótken daıyndyqqa oblys mektepteriniń V-VI synyptarda oqıtyn 62 bala qatysty. Jas matematıkterdi daıyndaý úshin Nur-Sultan qalasy ZERDELI aqyl-oı damytý mektebiniń ustazy Árin Qaısaruly arnaıy keldi.
– Daryndy balalardy «Altyn saqa» olımpıadasynyń oblystyq kezeńine daıyndap jatyrmyz. Oblys boıynsha jınalǵan oqýshylarmen bir aptalyq jumysymyz sátti ótti. Oqý-jattyǵýdyń sońǵy kúninde erekshe qabiletti 14 balaǵa oblys ákiminiń orynbasary Baqytgúl Hamenova alǵyshat tabystady. Bul kezeń oqýshylar úshin úlken múmkindik dep esepteımin. Óıtkeni, bilikti ustazdar dáris berip, oqýshylardy jan-jaqty daıyndaýda. Balalar «Ustaz» mektebiniń jataqhanasynda turaqtap, ýaqyttaryn tıimdi ótkizýde, – deıdi talanttardy anyqtaý jáne qoldaý ortalyǵynyń dırektory Rýslan Sarbalın.
«Altyn saqa» olımpıadasy – mektep oqýshylarynyń joǵary deńgeıdegi olımpıadalarǵa daıyndyǵyn jaqsartý jáne pán boıynsha bilimdi balalardy anyqtaý, olımpıada rezervin qalyptastyrý maqsatynda jyl saıyn dástúrli túrde ótkiziledi. Birneshe kúnge sozylǵan olımpıadaǵa daıyndyq barysynda H.Dosmuhamedov atyndaǵy Atyraý ýnıversıtetiniń qoldaýymen oqýshylar túrli psıhologııalyq trenıngterge qatysyp, qalanyń mádenı oshaqtaryn aralady.
Jan-Erke HALIÝLLINA,
"Adyrna" ulttyq portaly