Esbol Sūltanov – Parij olimpiadasynda Tunis elıne taekvondadan 2 tarihi jülde alyp bergen jattyqtyruşy. Byltyrdan berı bas bapker qyzmetın atqaryp kele jatqan qazaq azamatynyŋ şäkırtterı bır demde alǧaş ret altyn jäne qola medaldardy enşıledı. Esbol Sūltanov «Adyrna» tılşısıne bergen sūqbatynda Tuniske arnaiy şaqyrtumen barǧanyn aitty.
Būǧan deiın otandasymyz sportşy retınde 2006-2007 jyldary Beijıŋ, Doha, Bangkokte ötken jarystarda el namysyn qorǧaǧan bolatyn. Keiın bapkerlıkke auysyp, taekvondadan Qazaqstannyŋ kadetter qūramasynda, Ūlttyq qūrama sapynda kömekşı jattyqtyruşy bolyp jūmys ıstedı.
TUNİSKE TARTQAN JOL
Esbol Sūltanov özınıŋ Tunis komandasyna qalai bapker bolǧanyn aityp berdı.
- Ötken jyldyŋ qyrküiegınde Tunis taekvondo federasiiasynyŋ şaqyruymen osy eldıŋ ūlttyq qūrama komandasynyŋ tızgının qolǧa aldym. Negızınen qūrama sportşylarymen oqu-jattyǧu jiyndarynda bırneşe ret kezdeskenbız. Olar 2020 jyly Tokio olimpiadasynyŋ aldynda Almatyǧa kelıp, negızgı jattyǧu jiynyn ötkızdı. Sol kezden berı jaqsy qarym-qatynasta boldyq. Byltyrǧy älem chempionatynda Tunis jaqsy nätije körsete almai, medalsyz qaldy. Keiın bas bapkerlerın auystyryp, onyŋ ornyna jaŋa mamandy ızdedı. Bırneşe ümıtkerdıŋ arasynan menı taŋdap, jūmysymyzdy bastap kettık, - deidı ol.
17 jyldyq täjıribesı bar maman qazırgı taŋda özge elderden türlı ūsynystyŋ tüsıp jatqanyn mälımdedı.
- Tamyz aiynda kelısımşartym aiaqtaldy. Bız Parij olimpiadasyna deiın bırge jūmys ısteimız dep kelısken bolatynbyz. Tarihi körsetkışten keiın Tunis prezidentı kelısımşartty sozdyru, jalaqyny ösıru mäselelerın kötere otyryp, qaita ūsynys tastady. Taǧy bır-ekı elden de habarlasyp, jūmys ūsynǧandar boldy. Al Qazaqstanǧa kelsek, äzırge menımen eşkım bailanyspady. Ūsynystar tüsıp jatsa, ärine, qarastyramyz ǧoi, - deidı bapker.
SYRTTAǦY QAZAQ BAPKERINIŊ QAZAQSTAN KOMANDASYNA BAǦASY
Esbol Sūltanov Parij olimpiadasyna qatysqan qazaqstandyq taekvondoşylar turaly da aitty.
- Sportşylardy Kadet qūramasyn daiyndap jürgen kezde körgenmın. Batyrhan Töleuǧali – jasöspırımder arasyndaǧy älem chempionatynyŋ qola jüldegerı, Samirhon Ababäkırov – G-1 Turkish Open turnirınıŋ kümıs jüldegerı, eresekter arasyndaǧy turnirlerde şirek finaldarǧa şyǧyp jür. Ärine, ümıt küttık. Önerlerıne keletın bolsaq, Samirhonda mümkındık boldy. Alaida täjıribe jetıspei qaldy. Al Batyrhan älı jas sportşy ǧoi. Onyŋ şirek finalǧa jetuınıŋ özı jaqsy bastama dep oilaimyn. Sportta ärtürlı jaǧdai bolatynyn eskergen jön. Keide baby sai kelmeidı, keide baǧy janbaidy. Aldyŋǧy olimpiadalarda erkın küres şeberlerı jaqsy öner körsettı. Būl joly grek-rim, dziudo, sporttyq gimnastikadan qatysqan sportşylardyŋ baǧy jandy. Olimpiadaǧa eşkım ūtylamyn dep barmaidy. Bärı myqty daiyndyqpen, ülken ynta-jıgermen qatysady. Qazaqstanda sportpen ainalysuǧa jaqsy jaǧdai jasalǧan. Syrtta jürgendıkten, būl saladaǧy mäselelerdı aita almaimyn. Arnaiy komitet mamandary qorytyndy jasap, strategiialyq baǧdarlamalarmen jūmys ıstese, nätije bolary anyq, - dep pıkır bıldırdı ol.
JETISTIKTIŊ JEKE TÄJIRİBESI
Qazaq bapkerınıŋ pıkırınşe, älemdık dodalarda top jaru üşın köp närsege nazar audaru qajet.
- Jaqsy nätijenıŋ kıltı keşendı jūmysta dep aitar edım. Eŋ aldymen, myqty komanda jinauǧa män beru kerek. Jattyqtyruşylar qūramasy, psihologtar, medisina qyzmetkerlerı men menedjerler asa maŋyzdy röl atqarady. Mäselen, Barselona, Manchester Siti syndy futbol klubtarynda bas bapkerden bölek, közge körınbeitın myqty mamandar jüredı. Olar är sportşymen jūmys ısteidı. Bapker myqty bolyp, basqa mamandar jūmysyn naşar atqarsa, nätije şyqpaidy. Nemese bapker öz ısınıŋ şeberı bolmasa, federasiianyŋ köp aqşa bölgenınen de eş paida bolmaidy. Sol üşın de toptyq jūmysqa nazar audaru kerek. Men Tuniske barǧannan keiın komandaǧa qajet mamandardy özım taŋdadym. Tüiındemelerın qarap, būǧan deiın qol jetkızgen nätijelerıne män berdım. Jūmysqa alǧannan keiın köŋılım tolmai, bır aptadan soŋ ornyna basqa adamdy qabyldaǧan kezderım de boldy. Bır jyl üi körmei, bırlese qyzmet atqardyq. Endı, mıne, jūmyla ıstegen jūmysymyzdyŋ nätijesın körıp otyrmyz,- dep sözın qorytyndylady Esbol Sūltanov.
Diana Asan
«Adyrna» ūlttyq portaly
Ūqsas jaŋalyqtar
